Ka jingai wai ïa ka jaka sha ka MTPG ka dei ka kam kaba la dep ban pynbeit, ong u Mondal

Shillong, Lber 03: U Myntri ka tnad Bording u AT Mondal ha ka sngi Nyngkong ula ong ba ka mat kaba ïadei bad ka jingai wai ïa ka jaka sha ka Maitshaphrang Tourism Promotion Group (MTPG) kadei kaba la dep ban ïa pynbeit da ka jingïakren.
“Ïa kane ka kam la dep biang ban ïakren pynbeit bniah bha bad mynta ngi lah ban ïa pynbeit da ka jingïakren,” ong u Mondal haba jubab ïa ka zero hour notice ba la wanrah da u MLA ka VPP North Shillong Bah Adelbert Nongrum halor ka jingshim rai jong ka MTPG ban pynlong ïa ka jingïakhih hakhmat ka secretariat halor katei ka mat.
U Mondal ula ïathuh ba ka dewlynnong Lumpongdeng kaba don ha Pung Umïam ha ka jaka kaba 1, 64,797.48 sqm lane 40.72 akar kadei kaba la longtrai da ka MeECL.
Ka jaka kaba kot 1 Akar lah ai wai sha ka Maitshaphrang Tourism Promotion Group (MTPG) na ka bynta 10 snem naduh ka 7 tarik u Rymphang 1997 haduh ka 6 tarik u Rymphang 2007 bad ka jingsiew man la ka snem ïa ka bai wai ka long T.10,000 shi snem bad kan don ka jingpynkiew kaba 5% man la ka snem.
U la ong ba kumta ïa ka bai wai lah pynjlan katkum ka jingkyrpad jong u nongshim wai namar ba ka jaka kaba don kam pat dei kaba la pyndonkam da uba shim wai.
Shuh shuh halor kane u Myntri ula ong ba ïa katei ka jaka mynta la donkam da ka sorkar (MeECL) na ka bynta kiba bun ki kam pynroi.
U la pyntip ïa u chairman jong ka Maitshaphrang Tourism Promotion Group (MTPG), Shillong lyngba ka shithi kaba ha ka 11 tarik u Naiwieng 2024 ba kan ym don shuh ka jingpynjlan ban ai wai ïa katei ka jaka hadien ba ka jingai wai ka la kut noh ha ka 31 tarik u Nohprah 2024.
U la ong ba ka MTPG, Shillong ka la ïoh ïa ka jingjyrpad ban pyllait noh ïa katei ka jaka bad ïa ki jingtei kiba la pynïeng katkum ka Clause ba 7 jong ka lease agreement kaba la ong, “Lada ka jaka, ha kano kano ka por hashwa ban kut ka por jong ka jingïatehkular, lada donkam da ka Board Corporation ban pyndonkam ïalade, uba shim wai hadien ba u la ïoh ïa ka jingpyntip kaba shi bnai, dei ban pyllait noh ïa ka jaka bad ki jingtei bad ka Board ne ki ban shimti pat kin don ïa ka bor ban pyndonkam ïa ka jaka, uba ïoh shimwai yn ïoh pat ïa ka hok ban weng noh ïa ki jingtei baroh kiba la pynïeng da ma ki ha katei ka jaka hapoh jong ka shi bnai”.
“U Chairman ka MTPG lyngba ka shithi kaba ha ka 15 tarik u Kyllalyngkot 2025 ula kyrpad ïa ka MeECL ban pynjlan ïa katei ka jingai por khnang ba kan lah ban shimkhia ïa katei ka mat bad ki bor kiba dei khmih. Ïa katei la pdiang bad la pynjlan haduh ka 15 tarik u Rymphang 2025 ban ailad ba kin ïaid shakhmat ban leh ïa kaba donkam katkum ka Clause kaba 7 jong ka Land Lease Agreement,” ula ong.