Shillong, Lber 03: U MLA ka Nongkrem u Bah Ardent M Basaïawmoit ula ong ba u da kwah eh ba ka jylla kan kiew sha ka 10 ne 100 billion ha ka ïoh ka kot hynrei ka jingkren ka sorkar kam dei ban long tang da ka ktien hynrei ka dei ban pyni da ki kam bad kiwei ki bynta kiba long ka jingmyntoi ïa ka jylla hi baroh kawei.
Ha kaba ïadei bad kane haba shim bynta ha ka jingïathir ïatai halor ka jingkren u Lat hapoh ka ïing dorbar mynta ka sngi, u Bah Ardent ula ong ba u sngew triem ban ïohi ba ka jylla Meghalaya ka dei kaba lai ha ka jingduk ha ka ri India.
Katkum ka sorkar MDA, ka buh thong ban pynlong ïa ka Meghalaya ka ban kot sha ka 10 billion dollar ha ka ïoh ka kot ha 2028, hynrei haba phai sha kawei ka liang, katkum ka kaiphod 2023, ka Meghalaya ka wan balai ha ka jingduk bad ka jingduk ka long haduh 27.9 percent u dak ka jingduk bad ha u Naitung 2024 ba la dep, ka jingduk ka kot sha ka 6 percent kaba kham palat ïa ka jingduk haba kheiñ kyllum ha ka ri kaba long 3.2 percent.
U la ong, “Ka jingduk ha Meghalaya ka long 85 percent ki samla kim ïoh kam kim ïoh jam, bad haba peit ïa ka jingkheiñ, ka long kaba sngew triem ba ka jylla kan kot sha kane ka thong kumba la kam ka sorkar.”
Katkum ka kaiphod u CAG, ka ram ka la kot sha ka 73 percent hynrei ka sorkar ka ïai pan ram bad ki paidbah ki kwah ban tip katno ka sorkar ka la shim ram haduh mynta bad katno ka la siew ïa ka ram.
Ka jylla Meghalaya kam dei kaba khlaiñ ban pynmih khajna hynrei ka shaniah tylli ha ka jingisynei ka sorkar pdeng bad bun ki skhim pynroi ki dei jong ka sorkar pdeng kiba shu pyntreikam ka sorkar jylla kat haduh kine ki sngi.
