Mang ka sorkar T. 538 klur tam na ka bynta ka New Shillong Water Supply Scheme Phase 1

Shillong, Lber 03: U Myntri ba khmih ïa ka tnat Public Health Engineering (PHE) Marcuise N Marak u la ong ba ïa ka New Shillong Water Supply Scheme Phase 1 la ïoh ka jingmynjur hapoh ka administrative ha ka 15 tarik u Lber, mynshem snem ha ka jingmang tyngka kaba la kot sha ka T. 538.44 klur hapoh ka State Plan.
Hynrei ha kaba ïadei pat bad ka New Shillong Water Supply Scheme Phase II kaba kot T. 1,111.56 klur ym pat ïoh satia ïa ka jingmang tyngka.
Haba jubab ïa ka call attention hapoh ka dorbar Mang tyngka hapoh ka Ïingdorbar, u Marak u la ong ba hapoh ka phase-I, ka Engineering Procurement & Construction (EPC) contract la ai sha ka M/s BAC Infratech Private Limited ha ka 26 tarik u Jylliew, 2024 bad halor kane ka kam ka la dang ïaid.
U la ong ba ka kam contract na ka bynta ban pyntrei ïa ka kam ha kaba ïadei bad ka jingtrei ïa ka New Shillong Township Phase-I ka dei ka EPC contract ha kaba kane ka kam ka kynthup ïa ka jingmyntoi na ka kam kaba kynthup ïa ka jingsorjamin, ka jingtohkit, ka jingpynwandur bad ka jingpynbiang ïa ki tiar ki tar, ka jingtei, ka jingbuh ïa ki tiar ki tar bad baroh ka jingsam ïa ka umbam umdih.
Ka jingmyntoi halor ka contract ka kynthup ïa ka jingpyntrikam bad ka jingpynneh ïa ki kam jong ka project na ka bynta ka 2 snem bad nalor ka jingai por kaba lah ban tam ïa ka 1 snem na ka por kaba la buh.
Ka jingtei ïa ka dam hapoh ka Wah Umkhen, ka raw water pump house/jack well sha ka pump 70 MLD kaba dei ruh ka jingdawa ban pynïoh ïa ka jingsam ïa ka umbam da ka jingdonkam ban pynïeng ïa ki pump na ka bynta ka 33 MLD, sub-statin bad kiwei na ka bynta ka 33MLD, ka supply bad ka jingbuh ïa ki MS raw water rising main pipe line na ka pump house sha ka raw water sump ha ka stage-I kaba hajan ka shnong Mawpdang & Jariot, ka jingtei ïa ka sump ha ka stage-I, ka jingtei ïa ka pump house ha ka stage-I kaba kynthup ïa ka supply bad ka jingpynïeng ïa ki pump, motor substation bad kiwei ha Stage-I, ka supply bad ka jingbuh ïa ka MS raw water rising main na Stage-I pump house sha ka WTP location kaba hajan ka shnong Bri-heh, Mawpdang, ka jingtei ïa ka 33 MLD WTP kaba dei ka kam kaba la dawa, ka jingtei ïa ka clear water sump, ka jingbuh ïa ka SCADA system, bad kiwei kiwei kaba kynthup ruh ïa ka civil, mechanical bad ki kam electrical na ka bynta ka drawal jong ka 70/33 MLD ka um ha baroh shisnem napoh ka Wah-Umkhen kaba don hajan ka shnong Nonghali/Nongkhroh.
Ha kaba ïadei bad kane na ka liang u Myntri u la pyntip ruh ba na ka bynta ban pynïoh ïa ki lad treikam kiba long katkum ka juk kaba mynta donkam ka jingkhmih bniah ha baroh ki liang khamtam ha kaba ïadei bad kane ka project, baroh ki jnit ki jnat hapoh ka phase-I jong ka project yn hap ban pynïeng lyngba ka jingpeit bniah ka SCADA (supervisory control and data acquisition)/IoT (Internet of Things) system.
“Kumta baroh ka rukom treikam jong ka project kan dei hapoh ka jingpynïaid da ka SCADA/IoT systems kaba dei ruh kaba la pynbiang ïa ki rukom treikam katkum ka juk kaba mynta ka ban khmih bad bishar ïa ki kam jong kane ka scheme. Kane kan ïarap ruh ban lap ïa ki jingduna ha kiba bun ki liang la ka long ha ka jinglait ka um bad kiwei kiwei,” u la ong.