Da ka jingïakop shondur mariang pynlong ka JTES ha Thlumuwi ban kyntiew ïa ka kam jngohkai pyrthei

Jowai, Risaw 18: Ka Jaiñtia Tourism and Environment Society (JTES), ka seng kaba kyntiew ïa ki kam jngoh kai pyrthei bad pynnneh pynsah ïa ki jingitynnad jong ki sawdong sawkun jong mariang ha ri Lum Jaiñtia, kaba la seng naduh u snem 2006, ryngkat ka jingïatreilang bad ka ‘Samsawa Production’, mynta ka sngi jong ka 17 tarik Risaw, ki la pynlong ïa jingïakop shon dur ne kaba la tip kum ka Photography Exhibition halor ka phang Discover Jaiñtia Nature’s Own Land, ïa kaba la pynlong ha Thlumuwi kaba don ha u surok Jowai-Dawki, shwa ban poi ka shnong Amlarem.
Ha kane ka jingïakop mynta ka sngi la don haduh 22 ngut ki nongïashim bynta, kiba kynthup ïa 17 ngut ki shynrang bad 5 ngut ki kynthei, kiba kynthup ïa ki samla pule jong ka Kiang Nangbah Government College, Jowai, Jaiñtia Eastern College, Khliehriat, kumjuh ruh ki riew shimet na ki thaiñ bapher bapher jong ka jylla bad na kiwei de ki jylla jong ka ri kum na West Bengal bad na kiwei de ki jaka, ha kaba kane ka jingïakop ka la long kaba shongshit bad kaba iphuh iphieng.
Ïa ka nam lahduh ha kane ka jingïakop la ïoh rah da u Dapmon Syngkor uba na ka shnong Syndai, na ka dur jong ka Kshaid Lateng Amthyllem kaba don ha Padu Amsku, West Jaiñtia Hills Distirct, ba ar da u Kyrshanbor Pala na Lawjynriew Nongthymmai, Shillong East Khasi Hills District, na ka dur jong ka kshaid Thwei Sijri, kaba don ha Mustem, West Jaiñtia Hills District, katba ha ka kyrdan ba lai la ïoh rah da u Dr. Lawiki E Shullai na Salaroh, Jowai, na ka dur ba u la shon ïa ka Kshaid Thlu Kyrthem kaba don haka shnong Iongnoh, West Jaiñtia Hills District.
Hashwa ban sam ïa ki khusnam sha ki nongjop ha kane ka jingïakop la don ka jingïalang kaba lyngkot kaba la pynïaid da u ma MS Lhuid, Secretary u ba dei ruh u founder member ka JTES, ha ka jingïadonlang ma Rupaya Lamar, ma H. Toi Principal KNG College, ma Ruhi Phawa dkhot ka JTES kumjuh ruh ka ‘Samsawa Production’ ryngkat ka jingïadonlang kiwei de ki nongkitkam bad dkhot jong ka JTES kumjuh ruh na ki nongkitkam ka Samsawa Production bad kiwei de ki riewrangbah. Ïa ka khusnam sha ki nongjop la sam da ka song pisa ryngkat ki syrnod kumjuh ruh la sam ia ki syrnod sha baroh kiba la wan ban ïa shim bynta ha kane ka jingïakop.
Ka thong jong ka competition ka long ban pyni sha ka pyrthei ba dang bun ki kshait ki ba rieh ha Rilum Jaiñtia bad balei la pynlong ïa ka Photo Exhibition ha Thlumuwi ka long ban pyn i sha ki Tourist ba dang don shibun ki jaka jngohkai pyrthei ha Jaiñtia hills khamtam ki kshaid, kane ka long shibynta ban kyntiew ïa ka kam tourism
La pynphuh pynphieng shuh shuh ïa kane ka program da ki jingrwai tynrai kaba la shim bynta da ki samla pule jong ka Kiangbah Government College Jowai, kumjuh ka jingiakop kyntip ne ka Quiz competition kaba la pynlong na ka bynta baroh kiba don ha kane ka programe bad kiwei de.