Shillong, Risaw 18: Kawei ka jingjia kaba la suba ba kadei ka jingshah kawang petrol bom ha Mawbah, Mawprem, hajan Shiv Mandir, ha ka por kumba 9.30 baje mynstep jong ka sngi saitjaiñ, ha kaba kawei ka scooty ba la shu ïehnoh ka la ing khong shi bynta ha katei ka jingjia.
Katkum ka jingiathuh jong ki briew ba sakhi, ki la ioh sngew ïa ka jingsawa kaba jur shabar bad hadien ki la iohi ba u petrol bomb ba la suba u la hap hajan kawei ka scooty bad kawei ka jaka die momo ba khlem da bthei.Ki la iathuh ruh ba ki la iohi ïa u wire uba la kem ding.
Donbok ba ym shym la don ba mynsaw, watla ki nongsakhi ki la ong ba utei u petrol bom uba la suba ba u lah ban hap ha tnum jong kawei ka ïing kaba don hajan.
U Superintendent of Police ka East Khasi Hills u Bah Vivek Syiem da ong u ba ki pulit kila ioh jingtip ha kaba ïadei bad kane ka jingjia bad kila sdang ban tohkit halor kane ka bynta.
Haba kylli hato ka dei ka jingsuba petrol bom, u bah Syiem u la ong ba dang wad ïa ka jingpynshisha ia kane ka kam.
“Ngi dang pyrshang ban pynthikna ïa ki jingshisha”, la ong u SP.
Ki pulit ki la leit mar mar sha katei ka jaka bad ki la sdang ïa ka jingtohkit ban lap ïa kiba donkti.
