Halor ka jingtyrkhong um ai jinghikai ka Presbyterian Youth Today ha Thangbnai, Mawkynrew

Shillong, Risaw 18 : Ka Presbyterian Youth Today International Network (PYTIN) ha ka 17 tarik u Risaw 2026 ka la pynlong ïa ka jingai jinghikai ne seminar halor ka phang ka jingtyrkhong um (Water Crisis) ha ka shnong Thangbnai, kaba hap hapoh ka Mawkynrew Block, East Khasi Hills.
Ha kane ka seminar la wanshim bynta da ki nongïalam bad ki dkhot jong ka PYTIN, ryngkat bad ki arngut ki nongpynshai ba kynthup ïa u Dr. Johnny Steven Langstang, Medical and Health Officer jong ka Riangdo CHC bad u General Secretary barim jong ka KJCF Guwahati, bad u Bah Sonfirstly Marbaniang, uba long u nonghikai bad u dkhot jong ka PYTIN.
Ha kane ka jingïalang la donlang ruh u Sordar Shnong Thangbnai, Bah Phrangsngi Pyngrope, ka Secretary jong ka PYTIN, Kong Ribhalang Mynsong, u Finance Secretary, Bah Pynskhem Suting, ki dkhot Executive jong ka seng, ki nongshong shnong, ki rangbah, ki longkmie, ki khynnah skul bad kiwei pat. Katba ïa ka prokram la pynïaid da u Bah Pynskhem Suting.
Haba ai jingbatai halor ka koit ka khiah, u Dr. Johnny Steven Langstang u la ai jinghikai ïa ki nongshong shnong, khamtam ïa ki khynnah, halor ki rukom sumar ïa lade ban ïoh ïa ka met kaba koit ba khiah. U la pyni ruh ïa ki rukom sait kti kiba dei ban bud ban ïada na ki jingpang.
Ha kawei pat ka bynta, u Bah Sonfirstly Marbaniang u la batai halor ka jingkyrduh um, khamtam ha ka por tlang, bad pynshai ïa ki daw kiba wanrah ïa kane ka jingeh. U la kdew ba ka jingpom pathar ïa ki dieng bad ki siej, ryngkat bad ka jingjulor jong ka mariang, ki lah ban noh synñiang sha ka jingtyrkhong um ha ki shnong ki thaw.
U la kyntu ïa ki paidbah ban ïatreilang ban pynneh pynsah ïa ka jingkhuid, ban sumar ïa ki tyllong um bad ban kiar na ka jingbret pathar ïa ki jaboh. Kane, u la ong, ka long kaba donkam ban pynneh ïa ka mariang kaba khuid bad ban kyntiew ïa ka koit ka khiah jong ki nongshong shnong.
U la kyntu ruh ïa ki paidbah ban pyndonkam hok bad ban tyngkai ïa ka um ha ki por ba duna ka um. U la ban jur ïa ka jingdonkam ban sumar bad ïada ïa ki tyllong um da kaba thung dieng bad siej, lyngba ka jingïatreilang hapdeng ki bor shnong, ki skul bad ki sengbhalang.
Ha kane ka jingïalang, ki nongshong shnong ki la pynpaw ruh ba ha kine ki sngi ki la mad ïa ka jingkylla ha ka jinglong jong ka suiñbneng, ha kaba ka jingshit jong ka sngi ka la nang jur katba ka jinghap slap pat ka la duna.
Ïa ka program la pynkut da ka jingkren ai khublei na i Kong Ribhalang Mynsong, Secretary jong ka Presbyterian Youth Today International Network.