Jowai, Risaw 16: Ka Hynñiewtrep Integrated Territorial Organisation (HITO), Jaiñtia Hills, ha kane ka 15 tarik u Risaw, ka la aiti ïa ka dorkhas ne ka memorandum sha u Deputy Manager ka National Highways and Infrastructure Development Corporation Limited (NHIDCL), ha Khliehriat, halor ka jinglong jingman jong u surok bypass uba na 4-Mile ban mih ha Khliehtyrshi, West Jaiñtia Hills District.
Ha ka dorkhas ka seng ka la pynpaw ba kumba long mynta utei u surok u la long uba la jot bha, kaba la wanrah ïa ka jingeh bad ka jingma kaba khraw ïa ki nongleit nongwan, kynthup ïa ki nongñiah kali bad ki nongïaid kjat. Ka jingdon jong ki thliew ha surok bad ka jingjot, jingmih ki maw ha u surok ki lah ban wanrah ïa ki jingjia aksiden lada ym shimkhia ban maramot noh kloi ïa kane ka jingman jong u surok.
Shuh shuh ha ka dorkhas, ki dkhot ka HITO, kiba kynthup ïa u General Secretary, u samla Cressence Ksoo bad u Vice President u samla Khiejoit Niang, ki la kyntu ïa ka NHIDCL ban peit bniah bad shimkhia ïa kane ka kam bad ban pynlong ïa ka jingmaramot bad ka jingpynbha ïa utei u surok khlem da pynslem shuh.
Ka seng ka la ban jur ba ka jingpynbeit kloi ban leh ïa kane ka kam, kan ïarap ban khanglad ïa ki jingjia aksiden, ban pynthikna ïa ka jingïaid kaba shngaiñ bad kaba suk bad ban ïada ïa ka jingshngaiñ bad ka bha ka miat jong ki paidbah nongleit nongwan lyngba une u surok.
