Shillong, Risaw 16: Arngut kiba wad RTI kiba kynthup ia ka Kong Dreamlet Mary Warjri President Seng Longkmie Pyllun shnong Madan Sohmylleng bad u Bah Arius Basaiawmoit President Meghalaya Youth Federation kila pynsngew ba ki kwah ban ïoh ïa ka jingpynshai ha kaba ïadei bad ka shnong Sohmylleng ka shnong Lawkanoh kaba kila dep wad jingtip lyngba ka Right to Information Act.
Ka Kong Dreamlet haba kren ha ki lad pathai khubor ha Shillong Press Club ka la ïathuh ba ki la pan ïa ka RTI na ka ophis jong u Syiem ka Hima Nongkhlaw ha kaba ïadei bad ki kot ki sla bad ka shnong Sohmylleng hynrei kim shym la ïoh satia bad ïa kane kila ujor ruh sha u Apellete Authority ka KHADC.
Hynrei haduh mynta la katto katne bnai kim shym la ïoh ïa ka jingpynshai kaba tikna wat na ka District Council ruh, ka la ong ba kim don kano kano ka jingpyrshah ïano ïano ruh hynrei ki shu kwah ïa ka jingpynshisha hato ka shnong Sohmylleng ka hap hapoh jong kano ka hima.
Ka kong Dreamlet ka la ong ba na ka liang jong ka Hima Nongkhlaw kam shym la ai ïa ka jubab kaba shai haba ïadei bad kane ka kam shnong hynrei ka la ong kumba ka paw na ki kot ki sla katkum ka AD Rules jong ka KHADC ka shnong Sohmylleng ka hap hapoh ka Hima Sohïong Lyngdohship.
Katba u Bah Arius Basaiawmoit u la ong ba ki kwah ban ïoh ïa ka jingpynshai la ka shnong Lawkanoh ka don ne em ïa u sordar shnong, ki nongkitkam shnong hapoh katei ka shnong kumba kila ïoh ïa ka jingbatai hynrei kaei kaba ki, ki tip ba katei ka jaka Lawkanoh kam shym don kata ka shnong.
