Pynhap pyrda ka skul Riwar Jaiñtia Church of God HS, Ladjaplem ïa ka jingdap 30 snem

Amlarem, Risaw 15: Ïa ka jingrakhe ba shisnem lynter halor ka jingdap 30 snem ne ka ‘Pearl Jubilee Celebration’ jong ka Riwar Jaiñtia Church of God Higher Secondary School, Ladjaplem la pynkut mynta ka sngi 15 tarik u Risaw, haka jingdonlang u Myntri ka tnad pule puthi ka jylla u ma Lahkmen Rymbui kum u kongsan.
Ha kane ka sngi naka liang u Myntri ula pynbna ïaka jingïarap pisa kaba ?15 lak na ka bynta ban pynbun ïa ki kamra klas jong katei ka skul.
Shuh shuh u ma Lahkmen haba ai jingkren ula ïaroh ïaka skul kaba la jam shaduh une u mawmer ba 30 snem jong ka jingïaid lynti, da kaba kyntu jur dei ban ai jinghikai sha ki khynah skul katkum ki lad jingtip kiba thymmai bad kumjuh ruh shaphang ka Community Integrated Skills Learning programme.
U Myntri ula khot ïa ki kmie ki kpa bad ki nonghikai skul ban ïarap ïa ki khynnah skul haka ban ithuh ïa ki sap ki phong ba ki don bad kyntu ruh ïa ki khynnah pule ban long kiba trei shitom bad minot na ka bynta ka lawei ba phyrnai.
La pynsngew ruh shaphang ka History jong ka skul kaba la sdang ha u snem 1996 da arngut ki nonghikai bad 17 ngut ki khynnah skul bad ka jingkyrshan u Pastor K.H. Mukhim bad ki paidriewngeit jong ka Balang.
Naduh bala pynkiew sha ka Higher Secondary Level mynta kala don 601 ngut ki khynnah skul bad 22 ngut ki nonghikai, la pynsngew ruh ki khynnah kiba wan pule ha kane ka skul ki long napoh ka West Jaiñtia Hills, East Jaiñtia Hills, East Khasi Hills bad na kylleng ki shnong khappud bad ka Ri Bangladesh.
Ka kong Veyotolu Kezo, IAS, Sub-Divisional Officer (Civil), Amlarem Sub-Division, kala kren shaphang ka jingkordor jong ka jingpule haki kamra klas. Haba ïadei bad ka National Education Policy 2020 kala pynshlur ban ïashim bynta ha kino kino ki jingïakop bala pynlong. Kala khot ïa ki khynnah ban kin pynpaw pyrthei ïa ki sap jong ki kum haka Technology bad Artificial Intelligence, ka jinglong tynrai nalor ki jingrwai, ki jingïalehkai Sports bad kiwei de.
La aiti ïa ka Memorandum da u Principal ka skul ha u kongsan halor ki jingdonkam jong ka skul kynthup naduh ka Lower Primary Section, ki klas I haduh V, hapoh ka PM SHRI, da kaba kyntu ïa u myntri ban ïarap katba lah ïa ka skul.
Ha kane ka jingïalang la ïoh ka jingpule Bible, ka jingduwai, ki jingshad, ki jingrwai, Choreography, ka fancy-dress ba la shim bynta da ki khynnah skul.
La pyllait paidbah ruh ïa ka Souvenir jong ka skul bad pynhiar ïa ka lama Pearl Jubilee. Ha kane ka sngi la ïoh ïa ka jingkren ai khublei na u Principal bah Hastingroy Kharkongor.