Mawkyrwat, ‘Nailur 10: Ka ophis treikam jong ka District Mental Health Programme (DM&HP), South West Khasi Hills District ha ryngkat ka jingïatreilang bad ka ophis jong ka Adolescent Health Clinic kiba hap ha ka jingpynïaid jong ka ophis treikam jong u District Medical and Health Officer (DM&HO) ka la rakhe ïa ka “World Suicide Prevention Day, 2023” kaba halor ka phang pdeng kaba dei, “Creating Hope through Action” ne “Ban pynlong ne wanrah jingkyrmen lyngba ki kam” ha Nativity Higher Secondary School, Mawkyrwat Auditorium, South West Khasi Hills District.
Ki Recourse Persons ha kane ka sngi ki long ka kong (Dr) B. Marweiñ, Vice Principal jong ka Sngap Syiem College, Mawkyrwat kum ka kongsan, ka kong A. Lyngkhei, Clinical Psychologist, District Mental Health Programme (DM&HP), South West Khasi Hills District, ka kong W. Lyngkhoi, Adolescent Counsellor bad ka kong B. Snaitang, Psychiatric Nurse ryngkat ka jingwan nongïashimbynta ki kynthup ïa ka hynniew tylli ki skul ryngkat bad ki nonghikai kata 10 ngut ki khynnah na kawei ka skul bad ki nonghikai skul.
Ka kong (Dr) B. Marweiñ, Vice Principal, Sngap Syiem College, Mawkyrwat haba kren ha ka jingïalang ka la tai halor ki jait case ha ka shim ïa ka jingim lade kata ka kynthup ïa kaba lah dep ban shim ïa ka jingim lade, kiba mut ban shim ïa ka jingim lade bad kiba pyrkhat ban bthat ne shim noh ïa ka jingim lade. Ka la ong ba ngi donkam ban ïada ïa lade na kaba pyrkhat ban shim noh ïa ka jingim lade kaba dei ruh kawei na ki jingpang ha ka jingmut jingpyrkhat. Ka long kaba donkam ba ngi pdiang ba ki jingeh ki don khnang ban ngin lah ban wad jingïarap bad ban ngin lah ban ïoh ruh ïa ki jingkoit bad lait noh na kita ki jingeh ne jingshitom. Ka la ong ruh ba ha ka jingim jong ki briew ki shem bun jingeh hynrei ki dei ban lah ban ïaleh pyrshah ïa kita ki jingeh.
Shuh shuh ka la ïathuh ruh ïa ki jingshem jong ka, ba ka la kynduh bun ki briew kiba shem jingeh bad shah ktah ha bor jingmut jingpyrkhat bad ba ki shah kren beiñ, pynbud nam bad shah kyntait hynrei kum ka nonghikai ka la ïarap katba lah ban ïasyllok lyngba ki jingnang jingtip ba ka don. Ka la ong ba ka jingkhia ne jingban ha ka jingpule ne ha ka jaka pule ka pynlong ïa ki khynnah ban shim noh ïa ka jingim lade. Namarkata, ka kyntu ïa ki khynnah ban leh ki kam ba bha im bha bad barabor dei ban ïaid ha ka lynti kaba bha bad ïarap ruh ïa kiwei pat kiba shem jingeh khlem da i-beiñ.
Ka kong A. Lyngkhei, Clinical Psychologist ka la batai halor ka daw jong ka jingpynlong ïa kane ka ‘World Suicide Prevention Day’ ha kane ka sngi bad ki jingdonkam ban rakhe ïa kane ka sngi. Ka la pynshai halor ki daw ba pynlong ïa u briew ban shim noh ïa la ka jingim bad ka la ong ruh ka dei na ka daw ba ki shah ktah ha ka jingpang jingmut jingpyrkhat. Ka la ong ba ha man la iwei na ka phra ngut ki briew ki don beit kiba ïaid lyngba ki jingwit ne jingpang ha ka jingmut jingpyrkhat. Ka la ai nuksa ha kaba nun ki khynnah ne ki khun lada ki kwah ïa kaei kaei ki byrngem ïa ki kmie ki kpa ban ïoh ïa kaba ki kwah kata ruh ka dei kawei ka jingduna ne disorder. Ka la hikai ïa ki khynnah halor ka koit ka khiah ha ka jingmut jingpyrkhat bad kumno ba pynkhlaiñ ïa ki lad jingïada.
Ka kong W. Lyngkhoi, Adolescent Counsellor ka kren halor ka jingdon jong ki jingïasyllok ne counseling service na ka bynta ki khynnah kiba hap ha karta kaba 10 – 19 snem karta ne Adolescent Age Group hapoh Mawkyrwat Civil Hospital. Ka la batai ba ha kane ka por ki dang don bun ki jingkylla jong ka jinglong ha ka met ka phad bad ka pyrkhat jong ki khynnah bad kane lah ban ka ktah ïa ka jingim bad ka jinglong jong ki. “Ki khynnah ha kane karta ki shem bun ki jingeh bad ki donkam ïa bun ki lad jingïarap bad nongïalam khnang ban ïada na kaba ngop ha ki kam kiba sniew”, ka la ong. Kumta ka la kyntu ïa ki khynnah ban pynphriang ïa kane ka jingtip ne jingsnewthuh ba ki ïoh na kane ka programme khnang ba kito kiba don kam jingïarap ne jingïasyllok ki lah ban leit sha kane ka clinic.
Katba ka kong B. Snaitang, Psychiatric Nurse, ka la batai halor ka phang pdeng jong kane ka sngi kaba dei “Creating Hope Through Action” kaba mut ban pynlong ne wanrah jingkyrmen lyngba ki kam. Wanrah jingkyrmen lyngba ki kam ka kynthup ïa ki jingpynshai paidbah halor ki jingïada na kaba shim noh ïa ka jingim lade bad pynduna ïa ka jingkren beiñ ne kren sniew ha kaba ïada bad ka jingshimnoh ïa ka jingim. Ka dei ruh lyngba ka jingkyntu halor ka jingsngewthuh, ban pynpoi sha ki paidbah bad ban ïathuh ïa ki jingshem ha ka jingim ba kane ka phang pdeng kan ai ïa ki briew ïa ka jingshlur ban shimbynta ha kaba ïada na kane ïa jingshem ne jingeh.
Kumta da kaba ai jingkyrmen ngi lah ban pynduna na jingkren beiñ ne kren pynbud nam ha kaba ïa dei bad ka jingshim noh ïa ka jingim and pynlong ïa ka jaka kaba ki briew kiba donkam ka jingïarap kin wan shakhmat ha ka ban wad jingïarap. Ka jingïakren kaba don jingmut bad sngewshngaiñ halor ka jingshim ïa ka jingim lade kan lah ban pynshai ba ka dei kaba bha ban kren halor kane ka bynta. Lyngba ki jingleh ne ki kam ngi lah ban ïarap bun ki briew kiba don ha ki jingeh.
Ka kong W.L. Nongtnger Marweiñ, Psychiatric Social Worker ka la batai halor ki jingtip bym shai ne jingsngewthuh bakla bad ki jingshisha ha kaba ïa dei bad ka jingshim noh ïa ka jingim lade ka la bteng ruh da ka jinglehkai pynbyrngia ïa ki khynnah da kaba kylli jingkylli ïa ki.
La pynïaid ïa kane ka progrogramme da ka kong Nydia Marbaniang, Monitoring and Evaluation Officer, District Mental Health Programme bad kaba la batai lyngkot halor ka District Mental Health Programme bad ki kam kiba ka ophis ka trei. Ka la batai ruh halor ka jingkordor jong ka koit ka khiah jong ka jingmut jingpyrkhat ba ngi dei ban shimkhia ha ka ban sumar ïa lade ngi ïoh ïa ka jingpang ha ka jingmut jingpyrkhat bad ka jingkren ai khublei na ka kong D. Marweiñ, Ward Assistant.
