Ka imlang sahlang bad ruh ka jaidbynriew kaba dang sahdien ka donkam shisha haduh katta katta ïa ki nongïalam kiba tbit bad kiba trei hok na ka bynta ban wanrah ïa ka roi ka par bad ban kyntiew ïa baroh ki lïang. Lah ban ong ba ka ri kaba la kiew shaphrang pat ki nongïalam ki donkam ïa ki nongbud bad ki nongkyrshan khnang ban lah ban kham pynbha shuh shuh ïa kaei kaba la bha lypa bad ïa kaei kaba ki paidbah ki la don ne la bit la bïang lypa. Hato ka jaidbynriew ne ka jylla Meghalaya jong ngi ka don mo ha kawei na kine ki kyrdan?.
Kat kum ka jingkhein kyllum la long ba ka jylla Meghalaya kadei kaba bun tam ki nongïalam kaba don da ki hajar ki nongïalam kata ki President bad ki Secretary jong ki seng bapher bapher khamtam ki sengbhalang nalor jong ki seng Politik bad ruh kiwei pat kumjuh. Hynrei imat ka long kaba bakla ban don ïa ki nongïalam kiba tbit. Kane ka long kaei kaei kaba sngew phylla namar ba ym don iwei napdeng jong ngi kiba kwah ïa ki nongïalam kiba tasngeng ne kiba biej. Ki nongïalam kiba tbit kiba don ka maiñ, kiba don ka sap ki la ïoh lypa ïa ka jingieit bad ka jingshanïah na ki paidbah. Ki nongïalam kiba tbit ki long kiba don ka jinglah ban kren bad pynshai,. ban ïasaid na ka bynta ki paidbah bad ruh ban trei na ka bynta ka jingmyntoi jong ki paidbah. Ki nongïalam kiba tbit kim mih tang na kata ka jylli jong ka jinglong nongïalam ba la bun bun snem, kiba kit ïa ki kam kum ki nongïalam jong ki Unit, ki Circle, ki District Level bad kumta ter ter.
Ki nongïalam kiba shisha ki dei kita kiba don ka jingthrang ban shakri ïa ki paidbah na ka bynta ki paidbah ym na ka ka jingbit jingbïang ïa lade. Hynrei ka jingong ba ban don ki nongïalam kiba tbit ka long kaba bakla ka dei na ka daw ba kum kitei ki jait nongïalam ki trei hapdeng ki paidbah na ka bynta ka jingmyntoi shimet. Ha ki sngi kiba la leit noh ne ha kata ka mynnor jong ka jaidbynriew ne ka jylla, la ïohi shisha ïa kita ki nongïalam kiba aiti ïa lade na ka bynta ki paidbah ka jylla ne ki paidbah ka jaidbynriew. Ki kloi ban ïapli ïa la ka jingsuk bad bah ïa ka jingeh ki paidbah ki len ïalade na ka bynta ka jaidbynriew. Kine kein ki nongïalam kiba wat ha ba kim don shuh ha kane pyrthei hynrei ka kyrteng jong ki ka dang im bad ka dang ïai kren haduh kine ki sngi. Hato kum ka Jaidbynriew dang lah mo ban klet ïa ki kam shlur bad kam len lade jong u Tirot Sing Syiem, u Kïang Nongbah, U Mom Bhut bad kiwei pat. Hynrei hato ki nongïalam jong kane ka pateng kaba mynta ki don mo ïa kane ka juh ka jinglen lade bad ka jingtrei ba shisha na ka bynta ki paidbah.
Haba ïa nujor ki nongïalam jong kane ka juk mynta ki long shisha kiba stad bad kiba ïoh ïa ka kabu namar jong ka jingroi jong ka jingstad bad ka jingïaid jong ka por hi. Haba shu peit khyndïat ïa ka jinglong jingman jong ki nongïalam ha kine ki sngi katno ka long kaba iduh jingkyrmen ïa ka lawei jong ka jaidbynriew namar ba bun na ki nongïalam kim trei satïa na ka bynta ka jingmyntoi jong ki paidbah, hynrei ki trei na ka bynta ka jingmyntoi shimet. Katto katne ki nongïalam kiba tbit bad kiba bïang shisha ki la kylla long pynban ki nongshet kylla ïa ka jingshanïah jong ki paidbah. Ki nongïalam ha ka ki jong ki jong ki bynta naduh ki kam sengbhalang haduh ki nongïalam Politik ki don ka la jong ka jong ka kamram ban pyndep. Hynrei kaba ha khlieh tam eh ka dei ka jinglong nongïalam ha ka Politik ne ha ka synshar ka khadar.
Ki paidbah ha kane ka bynta kim peit than eh ai ka seng kaba kita ki nongïalam ki ïadonbynta hynrei ki peit eh ïa kata ka jonglong ne ka jinglah shimet jong ki nongïalam. Ka long ka nuksa kaba im ba kumno ki paidbah ki shanïah ha ki nongïalam kiba lah bad kiba tbit, da kaba ki la jied ïa ki nongmihkhmat jong ki ym satïa ba ki ieng na ka party kaba heh ne ka party kaba theh tyngka hynrei ki jied namar ba ki dei kiba don ka jinglong kaba paka ban long nongïalam. Ka jingdon jong ki ha ka synshar ka khadar ka long ka jingkyrmen na ka bynta ka jylla hi baroh kawei lada ki shim khïa ban ïasaid bad kren na ka bynta ki pdïabah. Hynrei ka long pat kaba sngewsih ba bunna kiba kum kine ki nongïalam ha kine ki sngi ki la klet noh ïa kata ka nongrim ne ka thymmei kaba ki sdang mar ïapoi hapoh ka shuki, ki la ïa buaid bor lang noh.
Teng teng la i shisha kumba katei ka jingong ba ki nongïalam kiba tbit ki long kiba bakla, kane ka long namar ba bunsiem ki ïapein noh ïa u paidbah na ka bynta ka jingsuk shimet jong ki hi. Na ka bynta ka jingmyntoi shimet kim salïa ban die tad dor ïa ki paidbah, haduh ki nud wat ban iehnoh ïa ki paidbah bad ban hïar noh na ka shuki jong ki. Hato kane kam dei ka jingdie tad ïa ka bor jong u paidbah. Hato ki paidbah kin dang ïai ïaid ryngkat bad ki nongïalam kiba bakla. ne kumno? Ka kynta ka donkam ïa ki nongïalam kiba shisha, to ïaphai sha ka dïang bad sha ka mom shadien bad shakhmat buh ïa ka jingshanïah jong phi ha kita ki nongïalam kiba ym pat ju don ka jingthoh brïa kum kitei ki kam shet
