Jop kput ka WKH DCA ïa ka WJH DCA, pynliem ka Tura DCA ïa ka EGH DCA

Shillong, Nailur 10: Ka jingïalehkai jong ka lympung Meghalaya Cricket Association’s U-19 Girls Inter District Cricket Tournament kaba la long hynnin ka Sngi Saitjaiñ jong ka taïew ba ladep, ka kynhun jong ki thei ka West Khasi Hills District Cricket Association ka la jop kput haduh 127-ron ïa ka West Jaintia Hills DCA. Ka Dubleen Nengnong ka la khyrwit haduh 87 ron ha kane ka jingïakhun.
Ha kawei pat a jingïalehkai, ki thei ka Tura DCA ki la khur ïa ka namjop salit da 9 ron pyrshah ïa ka East Garo Hills DCA.
Haba phai sha ka jingïalehkai hapdeng ka WKH-DCA pyrshah ïa ka WJH-DCA, ka WKH ka la jop ïa ka toss bad ka la jied ban ban tied nyngkong kaba la pynlong ha Umbuda, Ri-Bhoi, bad ki thei ïalehkai kane ka kynhun ki la ïoh ban kamai 163 ron da kaba shah pynhap tang da 1 wicket haduh kaba kut jong ka 19 over kaba la pynduna na ka Group B.
Ka thei ïalehkai kaba la khur ïa ka nam Player of the Match ka la leit sha ka Nengnong kaba la tied haduh 16 tylli ki Four ha ka shi inning ban kamai haduh 87 ron na ki 73 dbol shuwa ban shah pynhap lyngba ka run out ha ka over kaba khadduh.
Haba beh ïa kane ka ron ba la buh da ka WKH, ki thei ka WJH ki la shah pynhap baroh ki wicket bad kamai tang 36 ron, bad dei tang ka Jinghaihun Ksoo kaba la ïoh ban kamai sha ka phew ron (10).
Ka thei kawangbol jong ka WKH, ka Emisakani Warjri ka la lah ban lehkai bha ha kane ka jingïakhur bad khur haduh 4 wicket bad tang 4 ron, katba ka paralok jong ka, ka Fenny Nongrum ka la khur 3 wicket tang 3 ron.
Haba phai sha ka jingïakhun napoh ka Zone 2 kaba la long ha Salpara, North Garo Hills, ki thei ka Tura ki la jop ïa ka toss bad ki ruh ki la jied ban tied nyngkong bad pynkut ïa ka 25 over da 94 ron shah pynhap da 3 wicket.
Ka Pillika R Marak t ka la ïoh ban kamai 25 ron khlem shah pynhap (not out), katba ka Mikchikime (19 ron) bad ka Cheriksa S Sangma (15 ron) ki dei ki player kiba la ïoh ban kamai sha ki phew ron na ka bynta ka kynhun.
Ka Kambesa A Sangma (1/3), ka Senggamchi N Sangma (1/21) bad ka Tangsilchi G Momin (1/22) ki dei ki thei kawangbol kiba la ïoh ban pynhap wicket ha kane ka jingïalehkai.
Haba dei sa ka pali jong ka EGH ban tied, ka Silkamchi Marak ka la ïoh ba ïarap da 19 ban kyntiew ïa ka ron na ka bynta ka kynhun 4 hynrei phewse ki wicket ki la hap wei hadien i wei. Baroh hynriew ngut ki thei kawangbol ka Tura ki la ïoh ban khur wicket ha kane ka jingïalehkai, bad kiba la khur tam ïa ka ar wicket ki kynthup ïa ka Mikchikime (2/8) bad ka Terisha S Marak (2/15).
Ka jingïalehkai mynta ka Lah Sngi U Blei, na ka Zone 1, Group B, ka WJH kan sa wanphai ban aireng pyrshah ïa ka Shillong Cricket Association, katba ka South Garo Hills DCA kan aireng pyrshah ïa ka North Garo Hills DCA.