Kyrpad ka Synjuk ki RS ban pynkynriah noh ïaka jingmaramot, ba dang dei ka aiom lehkmen khristmas

Nongpoh, Nohprah 13: Ka Synjuk ki Rangbah Shnong Ri-Bhoi District mynta ka sngi kala pynpaw ka jingsngewkhia kaba jur halor ka jingaibor jong ka sorkar ban sdang maramot ïaka jingkieng Umiam ha kum kane ka por ba ki paidbah ki dang ïabeh ban leit siew leit tda sha ki ïew ki hat bad khamtam ka jingpynkhreh ïaka khristmas bad snem thymmai, namar ka jingmaramot ïa katei ka jingkieng kaba la sdang mynta ka sngi klala wanrah ka jingdheng kali kaba jur bad buh jingeh ïaki paidbah ba leit ba wan.
Lah ruh ban kdew hangne ba naka liang ka ïingbishar Meghalaya High Court kala bthah ruh ïaka sorkar jylla ba ka dei ban khanglad ïaki kali ba kit palat pud ban ïaid lyngba ka jingkieng Umiam namar ka jingsynjor bad ap jingma jong katei ka jingkieng, bad wat ki bor district naka bor shaka por kila pynmih ruh ki hukum ban khanglad ïaki kali palat pud ban ïaid lyngba katei ka jingkieng ha kaba ki kali kit khia ki lah ban ïaid na surok Shillong Bye Pass, hynrei bun naki kali ki dang pynkheiñ ïaka hukum bad wat ki kali kit khia ki dang ïaid lyngba katei ka jingkieng kaba la nang pyntroiñ bad buh jingma ïa katei ka jingkieng.
Naka liang u Bah BB Makdoh Chairman ka Synjuk ki Rangbah Shnong u la ong ba kum ka Synjuk ka dap da ka jingsngewkhia halor ka jingshim rai jong ka sorkar ban maramot ïa katei ka jingkieng ha kum kane ka por ba ki paidbah ki dang bunkam ban leit ban wan bad ban pynkhreh pynkhrum ïaka khristmas bad snem thymmai ban leit ïew leit hat bad kumta ter ter.
U la ong ruh haka jingshisha ka sorkar kala dei ban pyrkhing bha ïaka leit ka wan jong ki kali kit khia ba ïaid lyngba katei ka jingkieng Umiam, wat hadien bala pynmih ki hukum naka ïingbishar bad kumjuh ka bor district ka Ri-Bhoi, namar kane ka dei ka por kaba ki paidbah ki leit ki wan bad bunkam ban pynkhreh pynkhrum ïaka khristmas bad lada ka jingmaramot ka dang ïaid mynta bun bnai kan long ka jingsyrtok ïaki paidbah ba leit ba wan lyngba katei ka surok.
Namarkata naka liang ka Synjuk ki Rangbah Shnong kala kyrpad sha ka sorkar ba ka dei ban pynkynriah noh ïaka jingmarmot ïa katei ka jingkieng tad ynda la dep ka aiom lehkmen ban pynsuk ïaki paidbah haka leit ka wan.