Nongstoiñ Nohprah 13: Ka synjuk jong ki nonghikai jong ki Primary skul sorkar kaba la tip kum ka Meghalaya Government Primary School Teacher Associtiation (MGPSTA) ka dei kawei ka kynhun kaba la seng la slem bha bad kaba la ïoh ïa ka jingithuh da ka sorkar bad kaba la don ïa ki shnat treikam ha man la kawei pa kawei ka district hapoh ka jylla.Ki don shibun bah ki nonghikai kiba dei ki dkhot ha katei ka synjuk kiba la shong thait noh na ka kam naduh ki snem kiba mynshuwa ïa kiba kam shym la don kano kano ka jingleh burom kyrpang da ka synjuk baroh kawei.
Dei tad haduh une u snem 2023 ba ha shuwa ba ka snem kan kut noh ki nongïalam jong ka MGPSTA Nongstoiñ Unit lyngba ki nongïalam ka la kynmaw ban leh burom kyrpang ïa ki nonghikai kiba la shongthait noh na ka kam.
Kumta kum ka jingkynmaw burom kyrpang ïa u synñiang u bynhei ba kitei ki noghikai ba la shongthiat ki la ai sha ka im lang sahlang, ka pule puthi lyngba ka jingshakri bad ka jingaiti lut jong ki ïa ka por bad ka buit na ka bynta ban hikai bad sam sha ki khynnah ïa ka jingnang jingstad ka synjuk ka la pynlong ïa ka jingïalang pynkup burom ïa ki khat arngut kii nonghikai kiba la shongthait naduh u snem 2019 haduh 2023.
Ïa katei ka jingïalangpynkup burom la pylong ha TRYSEM Hall ha ophis u Deputy Commissioner West Khasi Hills ha kaba la pynïaid da u babu K.K.Lynser president ka MGPSTA Nongstoiñ Unit uba bat ruh kum u Vice president ka MGPSTA sengkmie .
Ha shuwa ban pynkupburom ïa kitei ki nonghiai la pynlong ïa ka jingïalangba lyngkot ha kaba u bah S.T.Nongphud Asst secretary jong ka MGPSTA Nongstoiñ unit u la ai ka jingkren pdiang burom ïa baroh ki nonghikai kiba la wan ha katei ka jingïalang .Hadien ka jingpdiang burom ïa kitei ki nonghikai la ïoh ïa ka jingpynshai ïa ka jingtrei kam jong ka synjuk da u babu M.S.Ryntong secretary ka MGPSTA Nongstoiñ Unit.
Nalor kata la ïoh ïa ka jingpynkup burom ïa ki khatarngut ki nonghikai ba la shnong thait da u bah Methodius Dkhar MLA ka Mashynrut uba long u kongsan bad ruh da u SDSEO ka West Khasi Hills uba long u symbud kongsan.
Ki Nonghikai kiba la shongthait kiba la shah pynkup burom ha katei ka sngi ki long, u babu Liewrose Lyngdoh , u babu Mollington Dkhar, u Babu Teldamoris Kharsyiemlieh, u Babu Standingroy Lyngdoh, u Babu Wombing Wanñiang, u Babu Besilda Syiem, u Babu Medingland Myrthong, u Babu Drasstar Myrthong, u Babu Horendro Nongbak, u Babu Drissarsingh Wanñiang, u Babu Phlida Sun, Babu Moralinda Kharsyntiew.
Hadien ka jingpynkup burom la ïoh ïa ka jingkren lyngkot na u babu Liewrose Lyngdon, u Babu M.Mohrmen, u SDSEO ka West Khasi Hills bad khatduh eh la ïoh ïa ka jingkren na u bah Methodius Dkhar MLA ka Mawshynrut haba kren kum u kongsan ha katei ka sngi u la ong ba ki nonghikai ki dei ki kmie ki kpa kiba ar na ka bynta ki khun ki kti bad ki long ruh kum ki nongpratlynti ïa ka lawei jong ki khynnah namar lada khlem ki nonghikai yn ym don u briew uba nag bas tad , yn ym lah ban don ki ophisar , ki doctor bad kiwei kiwei.
Nalor kata u la ong ruh ba ki nonghikai ki dei ki briew kiba aiti lut met bad mynsiem ha ka kam ba ki trei hynrei wat la ki trei shitom katno katno ruh ki dang hap ban mad ïa shibun ki jingeh.Kumta ka donkam ïa ki nongshong shnong ba kin ïatrei lang bad ki nonghikai na ka bynta ban wanrah ïa ka bha ka miat jong ka jylla bad ka jaitbynriew baroh kawei.
