Poi ka Viksit Bharat Sankalp Yatra na ka bynta ki jaka sor sha Jowai, West Jaintia Hills

Shillong, Nohprah 13: Ka campaign jong ka Viksit Bharat Sankalp Yatra (VBSY) na ka bynta ki jaka sor ka la poi sha Jowai mynta ka sngi ha kaba la pynlong ïa katei ka prokram ha Madan Ladthlaboh.
Ka jing thmu jong kane ka yatra kalong ban pynthikna ka jingpoi pura ki prokram bapher bapher ba ïadei bad ka bha ka mïat ba la plie paidbah da ka Sorkar Indïa.
Hapoh kane ka campaign, ka kali ba la saindur kyrpang ka IEC (Information, Education, Communication) van ka la poi ha Ladthlaboh, kawei na ki iew ba pawnam ha kane ka thain.
Ha ka jingsangeh jong ka ha kane ka jaka, ka kali IEC van ka la ai jinghikai sha ki paidbah halor ki sienjam bapher bapher ba ïadei bad ka roi ka par ba la sdang da ka Sorkar Indïa na ka bynta ka jylla. Hapoh ka campaign IEC, la pynlong ïa ka camp ban ai ki lad jingshakri kum ki health checkup bym donkam jingsiew, ka jingai ïa ki Aadhaar card ha katei ka jaka bad kumjuh ruh ka jingpynthymmai ïa ki card ba la don lypa.
Ki nongshong shnong ruh ki la mih shakhmat ban pdïang ïa ki Ayushman Bharat health card ba la ai sha ki, bad ioh jingtip shaphang ka skhim PM SVANidhi.
Ha ka jingïalang, la pynlong ka jingbam smai halor ka Viksit Bharat Sankalp Yatra, ban pynlong ïa ka Indïa ka ri kaba la kiew shaphrang bad kaba lah ban kyrshan dalade hashuwa u snem 2047.
La pynlong ruh ïa ka quiz competition halor ka Viksit Bharat Sankalp Yatra hapdeng ki nongïashim bynta.
Ka Viksit Bharat Sankalp Yatra, kaba la plie paidbah da u Myntri Rangbah duh, u Narendra Modi ha ka 15 tarik Naiwieng 2023, ka thmu ban poi sha baroh ki briew ban ai jinghikai bad ban pynthikna ka jingpynpoi pura ïa ki skhim na ka bynta ka jingkhuid jingsuba, ki jingshakri ba ïadei bad ki kam pisa, ka bording elektrik, bad ka jingai ïa ki tyndong LPG, ka jingpynioh iing ïa ki briew ba duk, ka jingioh bam, ka jingioh ïa ka bam kaba tei bad ki lad jingsumar. Ka Yatra ka thmu ban kynthup palat 2.55 lak tylli ki Gram Panchayat bad palat 3,600 tylli ki bor pynïaid shnong ha ki jaka sor hashuwa ka 25 tarik Kyllalyngkot 2024, kaba la poi sha baroh ki distrik jong ka ri.