Nongpoh, Rymphang 25: Ka Seng HITO Umsning Area hynnin ka sngi ka la leit buh syndon da ka jingthoh sha u Officer Incharge ka Umsning Police Outpost bad la phah copy ruh sa u deputy Commissioner bad SP ka Ri Bhoi na ka bynta ban kyrpad ban buh ïa ki bor pulit ha ki jaka paidbah ka Umsning By-pass kaba don ka jingma haba leit ba wan ki paidbah ban kam ïa katei ka surokbah.
Haba leit ban aiti ïa katei ka jingthoh la ïalam da u Bah B. Umbah, General Secretary ka HITO Umsning Area bad ka daw kaba la pynlong ïa ki ban leit ai jingthoh ka dei halor ka nongrim ba don ka jingma lada ym don ki bor pulit ba pahara haba kam ki paidbah lyngba katei ka surokbah National Highway ha Umsning.Kine ki jaka ba pan bor pulit ban pahara ha Umsning ki kynthup ïa ka jaka ba hap ha ka surok by-pass ka Umsning-Patarim Junction, Umpoh junction bad ka surokbah hi baroh kawei, namar khlem ki bor pulit ka long ka jingma ïa ki paidbah ban kam lyngba kane ka surokbah khamtam ki khynnah skul namar ka jingbuh ki kali paidbah ba ïaid ba ieng lyngba kane ka surokbah.
Na ka liang ka HITO ka la kyrpad naduh u DC ka Ri Bhoi, u SP bad ruh u Officer Incharge ka Umsning ba kin shim khia ïa kane ka bynta, namar na ka por sha ka por ka ju mih ki jingjia ba sngewsih ïa ki paidbah bad lada don ki bor pulit ban pahara ïa ki paidbah haba kam ïa katei ka surok ka long ka jingshngaiñ ïa ki paidbah bai aid ba ieng lyngba katei ka surokbah jong ka surok Umsning-By Pass.
