Jowai, Rymphang 25 : Mynta ka sngi u District Magistrate, West Jaintia Hills District, Jowai u B.S. Sohliya, IAS katkum ka bor bala pynkup ha u ula pynmih ïa ka hukum katkum ka kyndon 144 CrPC ka ban treikam ha baroh ki bynta jong ka West Jaiñtia Hills District.
Katkum kane ka kyndon la khang ïa ka jingïalang ne jingïaid kynhun jong ki briew 5 ngut ne tam. La khang ban pynlong kino kino ki jingkren paidbah ne ki jingïalang paidbah kiba don jingïadei bad ka elekshon. La khang ïa ka jingpyndonkam ïa ki kor pynsawa ba khlaiñ bor.
La bthah ïa baroh ki nongkyrshan jong ki kynhun saiñ hima sima ba kim dei ban neh ne sah sha bar jong ka Constituency jong ki hadien bala kut noh ka jingïalap elekshon. Namar kane ka lah ban wanrah ïa ka jingbym shngaiñ ïa ka jingïathep vote. Hynrei kane ka hukum kan ym ktah ïa kito ki nongkitkam party kiba peit ïa ka jylla, tangba kin hap ban pyntip ïa ka jaka ba ki shong ki sah hapoh ka State Headquarter bad ïa ka leit ka wan jong ki.
La khang ruh ïa ka jingsah jong ki briew ba nabar ha ki kynja camp, ne ki Community Hall ne ha ki ïingkyndep ba shipor. Ka hukum ka khang pyrshah ruh ïa ka jingpynmih ïa kino kino ki jingkdew halor ka jingïoh vote ne tam vote jong u ne ka kyrtong, la ka dei ha ki kotkhubor lane ki electronic media kiba kynthup ïa ki social media ruh.
Kane ka hukum kan treikam ha baroh ki bynta jong ka West Jaiñtia Hills bad kan treikam naduh ka 4:00 PM jong ka 24 tarik u Rymphang 2023 bad kan bteng haduh ban da kut ka jingïathep vote kata ha ka 27 tarik u Rymphang 2023.
