Haduh katno nga leh kput ïa ka Umroi ba ki hap wan tim sih tim sang ïa ka ïing jong nga bad shoh ïa ka kurim jong nga : George B Lyngdoh
Nongpoh, Rymphang 25: Haba kren haka jingïalang paidbah jong ka party TMC mynta ka sngi ha Umroi, u Bah George B Lyngdoh u ba dei ruh u kyrtong ka TMC na katei ka Constituency, u la khñi ïam haba kynmaw ïaka jingduhnoh ïala u jong u para haka jingkem ding ka kali, ka jingduhnoh ïala ka jong ka kmie naka jingsngewsih bad khamtam eh ka jingwan thombor jong ki briew ka NPP ïaka kurim bad ki bahaïing ha sem dang shen.
Haba pynpaw halor ka jingshah thombor jong ki kynum bad ka lok dang shen ha Umroi Nongrah, u la ong ba ka mynsiem ka dap da ka jingsngewsih kthang kaba jur hadien ba u wanphai na Kyrdem ki la don ki briew kiba leit tim sih tim sang bad pyrta ruh haka kot hakhmat ïingsah jong u, hakhmat ka lok bad ki khun, kaba la pynlong ïaki kynum bad ka lok jong u ban khie naba thiah ban kyrpad ba kim dei ban hylla shiteng miet shiteng synnia, hynrei kitei ki briew kiba dei ruh ki nongkyrshan jong ka NPP kila pynban..
U la ong ruh haba pyrshang ban buddien ïaki, ki dei ki briew na Nongrah bad haba ïakren nyngkong ki sdang ban beit hynrei shu mih kynsan kumba 15 haduh 20 ngut ki briew kiba ker tawïar ïaka lok bad ki kynum jong nga, kila kynjat ïaka kurim jong nga, ki bok na shyntur, ki pajut ïa i shaka diang ka mon, wat ïaka kurim u MLA ruh kim salia ban leh kumne pyrkhat ïaki duk ki suk bad ki tymmen ki kro aiu kin leh lada ki jop ïaka elekshon bad wan ha ka bor.
Naka liang u Bah George B Lyngdoh u la buh jingkylli ruh ïa kitei ki briew haduh katno nga leh kput ba ki hap ban wan tim sih tim sang ïaka lok, ïaki khun bad ka ïing ka sem jong nga, ba ki hap ban ktah kti wat ïaka kynthei, da kaba kyrpad ruh ïaki paidbah ba ki dei ban long kiba stad ban bishar, namar ka jylla ka phaikhmat ïaka Umroi ban pynmih ïa u nongïalam ka Ri-Bhoi bad ka jylla.Shuh shuh, u la pynpaw ruh ba kum u kyrtong ka TMC na Umroi Constituency u dang don ïa kata ka mynsiem ban shakri ïa ki paidbah ka Umroi Constituency bad da ka jingsngewrit u la buh ka jingkyrpad ba ki paidbah kin kyrshan ïa u da ka jingieit khnang ba lada u wan biang ha ka bor un sa lah ban pyndep ïa shibun ki jingangnud jong ki paidbah ka Umroi Constituency, u la bynrap.