Kyntu u ma O.R. Challam ban pynshong nongrim bha ïa kaei ba ki kynhun seng saiñ hima ki la dep ban khlei

Jowai, Rymphang 25: U ma O.R. Challam kum uwei na ki nongshong shnong ka Jowai u buh ka jingkyntu ïa ki paidbah nongthep vote jong ka jylla ba kin long kiba stad hadien ba kila ïoh sngew ïa kaei ba ki Candidates bad ki kynhun seng saiñ hima sima kila dep ban khlei bad kaei ka thong ba ki don ban treikam ha kane ka san snem ban wan hadien ka jingïalap Election jong ki.
Ula ong kum ki nongshong shnong ki don ka hok ban jied ïa ki nongmihkhmat na ka bynta ki 59 tylli ki Constituency hapoh ka jylla, hynrei mynta ka jingma kaba ap ka dei ka jingwan sam pisa bym khuid da ki katto katne sha manla ki ïing ki sem jong ki paidbah.
“Kane ka pisa ba jaboh kaba ki leit ban tyrwa sha ki thliewiing naduh ka san hajar, 10 hajr, 15 hajar, 20 hajar bad kumta ter ter kala pynjabob ïa ki paidbah nongthep vote bad kan pynsniew dur kumjuh ïa ka ïing ka seng, ka shnong ka thaw bad ka jaitbynriew hi baroh kawei”, ong ma Challam.
U Blei ula thaw kyrpang ïa ka mariang da ka jingdon ki mar poh khyndew hynrei haduh mynta ym don kata ka Policy treikam ban wanrah ïa ka roi ka par bad ka ïoh ka kot jong ka jylla, wat ki skim ba wan na ka sorkar kmie ki don kila la dep pyntrei bad ki don ki bym pat dep pyntreikam bad kan jia aiu ïa kine ki skim, la buh jingkylli ma O.R Challam.
Kumta u kyntu jur ïaki nongvote ba kin long kiba stad ban jied ïa ki nongmihkhmat kiba kumno ban leit mihkhmat shapoh ka ïing dorbar thawaiñ ka jylla na ka bynta ka samoi 2023-2028 bad ka jingjop kan long ka jingjop kaba lah ban wanrah ïa ka jing kylla ha baroh ki liang.