Kyntu u MLA Jirang bad u Project Director ka DRDA ïa ki shakri Sorkar ban burom ïa ka kam ba la bynshet

Nongpoh Risaw, 31: Haba leit ban buh ïa uwei u Mawnongrim dang shen na ka bynta ban tei ïa ka Block Integrated Development Complex kaba don ha jan ka ophis u Block Development Officer ka Jirang C&RD Block, u MLA ka Jirang Constituency, u Bah Sosthenes Sohtun u la shim kabu ruh ban kyntu ïa ki nongtrei sorkar hapoh katei ka ophis u BDO bad ruh kiwei kiwei ki ophisar sorkar kiba hap hapoh ka Patharkhmah Civil Sub Division ba ki dei ban poi sha ki ophis treikam ha ka por ba biang bad ruh ban mih trei na ki ophis sorkar katkum ka por ba la buh da ka sorkar.
Haba kren halor kane ka bynta, na ka liang utei u MLA ka Jirang u la kren ruh halor shaphang kane ka subjek, ka lah ruh ban dei ba ka la don ka jingleh mon da ki nongtrei sorkar kiba ym burom ïa ka por ban wan trei bad kiba ju mih kloi ruh na ki jingtrei bad kane la sakhi ruh ba wat kawei ka kynhun ki riew rangbah ba la tip kum ka Western Ri Bhoi Dorbar and Social Welfare Organization ki la pynpaw ruh ha ka dorkhas kaba ki la ai sha u MLA ban kyntu ba ka Patharkhmah Civil Sub Division ka dei ban treikam bha bad ruh ba ki nongtrei sorkar ha ki tnad bapher bapher ruh kim dei ban leh mon ha ka jingwan trei ne mih trei bad ki hap ban burom ïa ka por ba la buh da ka sorkar.
Ha katei ka sngi, shuwa ban ai jingkren u MLA ka Jirang halor katei ka jingïalang ba la buh ïa u mawnongrim, la ioh ruh ka jingkren na u Project Director ka DRDA, Ri Bhoi, u Raja Brahma bad na ka liang une u heh ophisar ka Ri Bhoi ruh u la ban khia ha kajuh ka phang da kaba ong, ba ki nongtrei sorkar kumba la bynshet kam da ka sorkar ki dei ban shim ïa ka jingkitkhlieh bad u la ong ruh ban wan ki kam pynroi pynpar kiba ai jingmyntoi ïa ki paidbah kam shong eh tang ha ki nongmihkhmat bad kum ki nongtrei sorkar ruh ki don ïa ka bynta kaba khraw ba ki hap ban don ïa ka jingkitkhlieh ban trei na ka bynta ban kyntiew ïa ka roi ka par ki paidbah.
U la kyntu ruh ïa ki nongtrei sorkar ha ki tnad bapher bapher ba ki hap ban don ïa kata ka mynsiem jong ka jingkitkhlieh ban pyndep hok ïa ki kamram ba la bynshet da ka sorkar bad ym ban shu lehmon khlem da burom ïa ka por ba la buh da ka sorkar la ka dei ban wan biang por sha ki ophis treikam ne ban mih na ki ophis treikam ba ki hap ban burom ïa ka por ba la buh da ka sorkar khnang ba lada ki nongtrei sorkar ne ki ophisar ki don shisha ïa kata ka jingkitkhlieh kin wan shibun ki jingkylla kiba ai jingmyntoi sha ki paidbah.
Haba shim kyllum halor ki jingkren jong une u MLA ka Jirang, u Bah Sosthenes Sohtun bad u PD ka DRDA, Ri Bhoi, u Raja Brahma, ki la pynpaw ba ki shnong ba hap ha ka Patharkhmah Civil Sub Division, kiba bun ki dei ki shnong kiba dang sahdien ha ki kam pynroi bad dei namar kane ka daw ba la wan rah ïa ka Civil Sub Division khang ban kham wan shibun ki kam pynroi, hynrei lada kita ki nongtrei sorkar ne ki ophisar pat kim shim khia ban kit ïa ka lyngkor ba la bynshet da ka sorkar ka long kaba eh ban wan rah ïa ki jingkylla ha ka liang ka roi ka par bad ka bha ka miat jong ki paidbah ha katei ka thain, ki la bynrap.
Shuh shuh, haba kren ha kawei pat ka bynta ban wan ka roi ka par bad ban dang kiew ha baroh ki liang jong ki kam pynroi, u MLA bad u PD ki la kren ym tang ïa kata ka jingkitklieh ki nongtrei sorkar, hynrei ki la kyntu ruh ïa ki nongïalam shnong bad ki paidbah ka thain Western Ri Bhoi ba ma ki ruh ki dei ban ai ïa kata ka jingïatrei lang bad ka sorkar, namar dei tang ka mynsiem jong ka jingïatrei lang ngi lah ban kyntiew ïa ki shnong ki thaw bad katei ka thaiñ ha baroh ki liang jong ki kam pynroi kumba la angnud da ka sorkar lyngba ka jingdon kane ka Civil Sub Divsiion, ki la bynrap shuh shuh.