Rem ka bai rejister ban ïa ka bai thied jaka ha Ri Bhoi ujor ka SRS sha u Myntri

Shillong, Risaw, 31: Ka Synjuk Ki Rangbah Shnong Ri-Bhoi district ha ka sngi Baar ki la ïakynduh ïa ki Myntri Sorkar ban ïakren halor kiba bun ki mat na ka bynta ka jingbit jingbiang jong ki paidbah bad ki shnong kiba don hapoh ka Ri-bhoi district.
Ha ka jingïakren bad ki lad pathai khubor, hadien ka jingïakynduh ïa u Myntri ka tnat Social Welfare Bah Paul Lyngdoh u General Secretary jong ka Synjuk Ki Rangbah Shnong Ri-Bhoi District Bah P.B Sylliang u la ïathuh ba ha ka jingïalang ka Synjuk ka la kyntu ïa u Myntri ban kyntiew kyrdan ïa ka Mini-Anganwadi sha ka Main Anganwadi Center.
U Bah Sylliang u la ong ba ki don bun tylli ki shnong hapoh Ri-Bhoi district kiba la dei hok ban kyntiew kyrdan sha ka Aganwadi bapura katkum ka kyndon jingbun briew jong ka Integrated Child Development Service (ICDS) hynrei haduh mynta kim pat treikam satia kum ka Mini Anganwadi.
“Ngi la kyntu ïa u Myntri ban shimkhia ïa kane ka kam khamtam namarba ïa ka Ri-bhoi district la tip ruh kum ka Aspirational District bad u Myntri u la kular ïa ngi ba un sa shimkhia ïa kane ka kam na ka bynta ka jingmyntoi jong ki paidbah,” ong u Bah Sylliang.
Ha kaba ïadei bad ka jingïakynduh ïa u Myntri ka tnat Revenue Bah Kyrmen Shylla, ka Synjuk ka la kyntu ïa u Myntri ban bthah ïa ka tnat ba dei peit ba kan pynduna ïa ka dor bai rejistar khyndew ha ka ophis jong u Deputy cmmissioner (DC) Ri-bhoi district.
U Bah P.B Sylliang u la kam haba ki nongshong shnong ki donkam ban shim ram shna iing, ram phah pule ne haba ki seng ki kam ki jam, ki hap ban ai ïa ki dulir ba la rejistar ban pynshisha ïa ka jinglong trai halor ka jaka ka puta.
“Hynrei na ka daw ka jingrem shaba palat ka dor bai rejister jaka ha Meghalaya, ki paidbah khamtam kito kiba sah ha ki shnong khappud ki kham kwah ban rejister ïa ka jaka sha ka Sorkar Assam namarba ka bai rejister ïa ka khyndew ka kham duna bun shah haba ïanujor bad ka dor ba la buh da ka Sorkar Meghalaya,” ong u Bah Sylliang.
U Bah Sylliang u la ïathuh ba u Myntri u la kular sha ka Synjuk ba un sa rah ïa kane ka kam hapoh ka jingïalang jong ka Kynhun Myntri ka ban sa long shen bad ban ai jingmut kumno ban pynduna ïa ka bai rejistar khyndew ha ka ophis Deputy Commissioner.
Ha ka jingïakynduh ïa u Myntri ka tnat C&RD Block u AT Mondal, ka Synjuk ka la kyntu ba un shimkhia ban pyllait noh ïa ka Bill badang sah jong ka MNREGA Scheme.
U Bah Sylliang u la ong ba ha ki 2-3 snem, ïa ki bai tiar la phah da ka Village Employment Council (VEC) hynrei haduh mynta ka Sorkar kam pat pyllait satia ïa ka pisa bai thied tiar.
U la ong ka jingbym pyllait ïa ka pisa bai thied tiar ka la pynsangeh lut ïa ki kam pynroi ha baroh kawei ka Ri-Bhoi district.
“Ka bainong jong ki nongtrei bylla sngi haduh mynta ym pat shym la pyllait satia naduh u bnai Naitung 2023, bad ki paidbah nongshong shnong ki ïakynduh jingeh namarba kim don lad ban ïoh bainong. Namarba ki dei tang nongtrei Job Card ki bym ïoh bainong ha ka shitaiew, ki la kyntait wat ban trei ïa ka kam bad kane ka la pyndkoh lut ïa ka kam,” u la ong.