Maham ka DC ïa kiba pynieng khyrdop lum pisa be-ain ha ki surok ka East Khasi Hills

Shillong, Risaw 31 : Ka Deputy Commissioner ka East Khasi Hills Kong RM Kurbah ka la byrngem ban leh da kaba tyngeh pyrshah ïa ka jingpynïeng ïa ki check gate/toll gate ba khlem ïoh jingbit bad ban lum pisa be-aiñ na ki kali kiba ïaid ha ki surok National Highway, State Highway bad ki surok heh ba don hapoh ka District.
“Kano kano ka jingïaleh pyrshah/pynkheiñ, yn leh da kaba tyngeh kat kum ki kyndon Aiñ” ong ka kyrwoh na ka Deputy Commissioner.
Kane ka hukum ka la mih ruh tang shisngi hadien ba ki Pulit ka Laitumkhrah Police Station, ki la kem ïa uwei u Nongïalam ka seng Hynniewtrep National Youth Front (HNYF), uba donkti ban lum pisa be-aiñ na ki trok kit mar, ba kin ïoh ïaid na ka jingkieng Damsite, Umiam.
Une u Nongialam ka HNYF u dei u Bless Dkhar uba bat kum u President ka HNYF ka East Khasi Hills District.
Kat kum ka kyrwoh ka DC ka la ong “ Ka Ophis kala ïoh ïa ki jingujor, khubor bad ki jingud jingnam pyrshah ïa ka jingpynïeng ïïa ki khyrdop beaiñ ha ki surok National Highway, State Highway bad surok heh jong ka District”.
Ka la pyntip ba ka Sorkar Jylla ka la ïeng ha ka nongrim kaba skhem ba kan ym nym map satia (zero tolerance) halor ka jingmih ki khyrdop be-aiñ lane ka jinglum pisa beaiñ na ki kali kiba ïaid ha ki surok ba don ha East Khasi Hills.
Ka la ong ba ka jingpynïeng ïa kine ki khyrdop be-aiñ bad ki jingker ban lum pisa jubor na ki kali, ka la pynthut ïa ka jingïaid beit jong ki kali bad pynthut ruh ïa ka ïaid ka ïeng jong ki riew paidbah nalor ka jingbuh ïa ka jingma ba lah ban mih ki jingjia takhuh kali.
Namar kiei kiei, ka ong ba ka Ophis ka khang pyrshah ban pynïeng ïa kine ki khyrdop ba khlem ïoh jingbit lane kano kano ka jinglum pisa jubor na ki kali ba ïaid ha ki surok hapoh ka District.