Rung ki dkhot ka JAC sha jingïalang ka Academic Council, NEHU ba leh tam uwei u dkhot

Shillong, Risaw 31: Ka Joint Action Committee (JAC) jong ki Seng bapher bapher ha North Eastern Hill University (NEHU) kaba kynthup ïa ka Seng ki Nonghikai (NEHUTA), ka Seng ki Samla pule, ka NEHUSU bad ka Seng ki nongtrei, ka NEHUNSA, mynta ka sngi, ki la pynjur ïa ka jingïakhih da kaba tur sha ka kamra ba la pynlong ïa ka jingïalang jong ka Academic Council, namar ka jingïashim bynta jong uwei u dkhot ha ka Council.
Ka JAC ha kine ki sngi baladep, ka la dep ban shim ïa ka rai ban nym ïatreilang bad u VC, u Prof. Prabha Shankar Shukla namar ka jingthung beaiñ jong u ïa uwei u bar jylla, u Rohit Prasad kum u Technical Officer/Senior Consultant, ha kaba ka JAC ka la aipor ban weng noh hapoh ka 26 tarik mynta u bnai.Hynrei u VC um shym la weng satia. Ka JAC ka la rai ban nym ïashim bynta shuh bad kino kino ki kam ba pynlong da u VC ne kata ka Non Cooperation Movement. Kiba bun ki dkhot jong ka Academic Council ki la pdiang ïa ka jingbthah ka JAC bad ki la mih noh na ka jingïalang jong ka JAC, hynrei la don uwei u Professor u bym shym la mih na ka jingïalang, kaba la pynlong ïa ki dkhot ka JAC ban rung shapoh ba pynlong ïa ka jingïalang ban pynrem jur ïa ka jingleh jong u.
Ha shuwa jong kane, ka JAC ka la ïalum lang ha ka Multi used Conventional Hall ha kaba la thmu ban pynlong ïa ka jingïalang jong ka Academic Council, hynrei hadien ki la ïoh jingtip ba ka jingïalang ka la long noh ha Conference Hall ka ophis u VC. Kumta ki la tur sha katei ka hall ban pyrta shla pyrshah ïa u VC bad khamtam eh ïaki kam beaiñ jong u.
Hadien ba ki la mih na ka jaka ba tur sha ka jingïalang ka Academic Council, ka JAC ka la pynlong ïa ka jingïalang ban ïakren ïa ki kam beaiñ ba la leh da u VC. Ha kane ka jingïalang ka JAC, ka la shim ïa ka rai ban pynneh bad pynskhem ïaka jingdawa ban thung noh ïaki Statutory Officer, nangta ïa u Engineer ka University bad u Director jong ka CDC.