Nongpoh, Risaw, 31: Kum kawei na ka thong ban pynurlong ïa ka thong jong ka Fit India Run na ka bynta ka jingkoit jingkhiah bad ruh ban ïalap halor ka jingdonkam ban ioh ïa ka met kaba khoit ba khiah, ka Ophis u District Sport Officer ka Ri Bhoi ryngkat ka jingïatrei lang bad ka ophis u Deputy Commissioner ka la pynlong ïa ka jingïamareh thong ba la tip kum ka ‘Fit India Run’ ha Ri Bhoi District.
Ïa kane ka Fit India Run la wan ban plie paidbah da u President ka Ri Bhoi Dorbar, u Bah R.B Shadap kum u kongsan bad la sakhi lang ruh da ka jingdon lang u District Sport Officer, u Bah Bobby Nongbet, kiwei ki ophisar bad ki nongtrei na ka tnad sport jong ka Ri Bhoi.
Kane ka jingïamareh thong ba la tip kum ka Fit India run ka la sdang naduh ka por 7 baje mynstep na Saiden Indoor Stadium bad pynkut pat ha NSCA Indoor Stadium, Umlyngkdait Nongpoh.
Ha kane ka jingïamareh thong la wan ruh ban shim bynta naduh ki samla kynthei bad shynrang na ki shnong bapher bapher bad kynthup ruh ki heprit bad ki longkmie bad longka kiba la heh ha ka rta.
Ha kane ka sngi shuwa ba ki samla kin shim bynta ha kane ka jingïamareh thong la ai jingkren ruh da u Bah R.B Shadap kum u President ka Ri Bhoi Dorbar, uba la ai ka jingïaroh ïa ka ophis u District Transport Officer bad ka ophis u Deputy Commissioner kiba la pynlong ïa kane ka jingïamareh thong bad ka thong hi ka long ban pynshlur ïa ki samla ba kin phai khmat sha ki kam sport bad ruh ban ioh ïa ka met kaba koit ba ka khiah katkum ka thong jong ka Fit India Run.
Kum u nongïalam ba rangbah ka Ri Bhoi Dorbar, u la kyntu ruh ïa ki khun samla ba kin ïa trei lang halor ka thong jong ka sorkar India lyngba ka Fit India run bad kum ki samla ki hap ban pyni ïa ka nuksa sha kiwei ba kin tip ïa ka jingkordor jong ka khoit ka khiah bad ban ioh ïa ka jingkoit jingkhiah ka jingdonkam ba hakhmat eh ka dei tang ka jingkyllanmet kaba man ka por da kaba kin pynlut por ha ki kam ïalehkai sport.
Ka ophis u DSO, Nongpoh ki la pynkhreh ruh ïaka trophy bad ka song pisa sha ki nongjop ha kaba ki ba wan ba nyngkong kin ïoh ïaka song pisa kaba 5 hajar, baar 4 hajar bad balai 3 hajar tyngka. Bad kiba wan ban shim bynta haka kyrdan kiba rit tam haka rta bad kiba heh tam haka rta kin ïoh rah ïaka song pisa kaba mar 1 hajar tyngka.
Lyngba jong kane ka jingïamareh thong haka thup jong ki shynrang, u samla Monas Bongrung u la wan haka kyrdan kaba nyngkong, u Samla Erisstar Sohshang u la wan baar bad u samla Lapynkhraw Thabah u la wan balai. Haka thup jong ki kynthei ka samla Barisha Khymdeit ka la wan ba nyngkong, samla Sildaris Makri ka la wan baar bad samla Barilin Sylliang ka la wan balai. Bad ïa ka nam kiba la San haka rta naka liang ki shynrang u la ïoh da u bah Ibansuklang Warlyngah bad naki kynthei la ïoh da i kong Snora Rani. Bad ïa ka nam kiba rit tam ha ka rta naka thup ki shynrang la ïoh rah da u Leonard W Narlong bad naki kynthei la ïoh da i Phibanrai Khongngai.
