Khliehriat, Risaw, 31: U District Magistrate, East Jaiñtia Hills District ha ka hukum ba la pyllait ha ka sngi Baar u la pynbna ïa ka jingpynjari ïa ki kyndon aiñ 144CrPC ha East Jaiñtia Hills District, kane ka long ka jingmana ban shna ïa kino kino ki jingshna ne jingtei (commercial establishments) ba hapoh ka jingjngai kaba 50 mitar na kino kino ki jaka kiba don ki um ki wah.
Kane ka jingpynjari ïa kane ka kyndon aiñ (144CrPC) ka long ban ïada ïa ki um ki wah ban lait na kano kano ka jingshah pynjulor ne kino kino ki jimgma ba lah ban pynsniew ïa ki um ki wah kiba don ha East Jaiñtia Hills District, namar kiba kum kine ki jingsniew donkam ban long phikir ban peitngor bha.
La ong ruh ba lada don kiba donkam ban shna ïa kino kino ki jait jingtei ne jingshna (commercial establishments) harud ki um ki wah ki dei ban da ïoh jingbit na ka ophis jong u District Magistrate jong ka East Jaiñtia Hills District.
