Nongpoh, Nailur, 20: Ka Dorbar Shnong Lumdaitkhla Bhoirymbong ha Ri Bhoi District ka la hap ban mad ia ka jingeh kaba khraw bha na ka bynta ban wan rah ïa ka khuid ka suba hapoh katei ka shnong, bad daw ka long ba kim don ia ka jaka ban theh ñiut khamtam ba katei ka shnong ka don ïa ka ïew Bhoirymbong kaba dei kawei na ka ïew kaba la heh bha ha ka thaiñ Ri-Bhoi Mihngi.
Ban weng ïa katei ka jingeh ki paidbah, ka Dorbar Shnong Lumdaitkhla mynta ka sngi ka la lum syndon da ka Dorbar shnong na ka bynta ban ai jingpynshai sha ki paidbah halor ka jingthmu ban wan rah ïa ka Solid Waste Management ha katei ka shnong, namar kumba long haduh mynta ka shnong ka la hap ban theh ïa ki jaboh ba mih na ka ïew bad na ka shnong shipor ha Madan Kurkalang na ka daw ba kam pat don kata ka jaka theh ñiut ban leh katkum ka juk stad mynta (Scientific Method.)
Ki paidbah nongshong shnong kynthup naduh ki Samla, ki Longkmie, ki rangbah mynta ka sngi ki la shim bynta ha ka jingïalang paidbah ba ka shnong ka la lum la lang na ka bynta ban pynshai halor ka jingthmu ban wan rah ïa katei ka Solid Waste Management khnang ban weng ïa ki jingeh jong ki paidbah bad khamtam ban wan rah ïa ka khuid ka suba hapoh katei ka shnong Lumdaitkhla Bhoirymbong.
Ha kane ka sngi u samla na ka shnong Umpling Shillong, u Samla Banbhalang Diengdoh u la wan ban pynshai sha ki paidbah halor ka jingthmu jong kane ka Solid Waste Management, namar ha ka shnong Umpling une u samla ryngkat ka kynhun ki pyntreikam ïa ka Solid Waste Management kaba ki la leh katkum ka juk stad mynta bad kaba dei ruh ka rukom leh kaba ym ktah ïa ka koit ka khiah ki paidbah ne kaba ktah ïa ka mei mariang.
Kumba la pynpaw da ki Nongïalam Shnong naduh u Rangbah Shnong, u Bah S.T Rympei, u Bah Reading Rymbai, Secretary Shnong bad u Bah S. Lamare, Chairman ka Dorbar Shnong, ki la ong ba haduh mynta ki la dep ban thied ïa ka jaka na ka bynta ban wan rah ïa kata ka Solid Waste Management hapoh u pud u sam ka Shnong Lumdaitkhla bad ki la ioh ruh ka jingïarap na ka KHADC ba ki la ker kynroh shuwa ban thmu ban wan rah ïa katei ka Solid Waste Management.
Kaei kaba la pynlong ïa ka Shnong ban lum ïa kane ka Dorbar ka dei namar ba bun ki paidbah nongshong shnong ki la shah pynsngewthuh bakla ba ka shnong ka thmu ban wan rah ïa kata ka jaka theh ñiut, hynrei kam dei kumba ki la shah pynsngewthuh bakla bad ka dei ka jingthmu ban wan rah ïa ka Solid Waste Management kaba dei katkum ka juk stad ba mynta kaba ym ktah ïa ka koit ka khiah ki paidbah bad ruh wat ïa ka mei mariang.
Kitei ki nongïalam Shnong ki la pynshai ruh kumba la mih ha ki lad pathai khubor ba la pynmih da ka Shnong Lumsohpieng la pynsngewthuh bakla ïa ki paidbah bad ha ka jingshisha katei ka jaka ka dei kaba hap ha u pud u sam ka Shnong Lumdaitkhla ha kaba ka ka shnong kam mut ban pynlong tang kata ka jaka theh niut bad ka dei kata ka Solid Waste Management kaba ki leh katkum ka juk stad kaba ym ktah ïa ka koit ka khiah ki paidbah bad ïa ka mei mariang.
Shuh shuh, ki la pynshai ruh ba ki paidbah ki hap ban sngewthuh namar kumba long haduh mynta ka bor shnong ka kynduh mawsiang na ka jingbym don kata ka jaka theh ñiut kaba biang bad katba ki jaboh pat kiba mih na katei ka ïew la shu hap ban leit theh sha Madan Kurkalang ha kaba katei ka jaka ka dei ka jaka ba ki samla ki pynleit jingmut ha ka jingïalehkai sport.
