Bthah u District Magistrate ka SWKH ïa ki dukan ban pyndait CCTV Camera

Mawkyrwat, ‘Nailur 20: U District Magistrate (DM) ka South West Khasi Hills District, Mawkyrwat, u la pynbna paidbah ba ki don ki jaka ha ka distrik kiba ju long ki ktem khaïi drok bad dih drok bad kiwei kiwei de ki kam sniew kiba buh ka jingma bad ka jingshong syier ïa ki nongleit nongwan bad ki nongshong shnong.
Ha kaba ïa dei bad kane, u District Magistrate ka South West Khasi Hills District, Mawkyrwat u la pynjari da ka kyndon 133 CrPC ha kaba u la bthah ïa baroh ki Dukan Die Dawai, ki Departmental Store bad ki Wine Shop kiba don ha ka South West Khasi Hills District ba kin buh da ki CCTV Camera ha ki bynta jong ki dukan jong ki.
Ïa kane ka hukum la pynmih kum shibynta ban khang lad ïa kine ki nongdih drok kiba thmu ban leh ïa kino kino ki kam sniew hapoh ka distrik bad ka jingbuh ïa ki CCTV kan ïarap shibun ban khang lad ïa ki kam sniew kumjuh ruh ban ïoh ïa ki sakhi ki sabut kiba biang bad ba tikna ban pynsuk ïa ki bor ba dei khmih ba kin lah ban buddien bad kem ïa kito kiba donkti ha ki kam sniew.
Namarkata, da ka jingdonkam ba kyrkih, ïa kane ka hukum yn pyntreikam shwa shipor bad la don kino kino ki jingujor ha kaba ïa dei bad kane ka hukum ki lah ban wan ïa kynduh ha ophis treikam jong u District Magistrate, South West Khasi Hills District, Mawkyrwat hapoh 30 naduh ba la pyntreikam ïa kane ka hukum.