Nongpoh, Nailur, 20: Ka Confederation of Ri-Bhoi People (CoRP) kala lap ba ka Meghalaya Industrial Development Corporation Ltd kam don satia ïaki kot ki sla ki biang halor ki jaka puta bad jaka treikam ki karkhana ha ka thaiñ Byrnihat ha kaba naka liang ka CoRP kala pynpaw ba katei ka jaka la shu kurup beaiñ da ka MIDC hadien ba ka seng kala wad jingtip lyngba ka RTI.
Haba kren sha ki lad pathai khubor naka liang u Bah Pateng Marsing Working President haka jingdonlang u Bah Shining Kyntla Finance Secretary u la ong ba ba hadien ba ka seng kala pan da ka RTI halor ka jaka bala kurup da ka MIDC ha Byrnihat ka seng kala ioh jubab haka 1 tarik Nailar, bad ha katei ka jubab naka liang ka MIDC kam shym la lah ban pyni kawei ruh ka kot ka sla naduh ki Land Agreement bad ki kot ki sla kiba biang ban pynshisha ïaki jaka ba kala klun, ha kaba ka seng ka dap da ka jingsngew lyngngoh ba kumno katei ka MIDC ka lah ban kam ïaka jaka khlem ki kot ki sla biang.
Shuh shuh u la ong ruh ba naka liang ka seng kala wad jingtip ruh na u Syiem ka Raid Marwet ba katei ka jaka ka dang dei kaba hap hapoh ka jingpeit jingkhmih jong ka Raid Marwet bad wad ka kot ka sla naka Raid ruh kim don satia ban pynshisha bad halor katei ka jingbym don kot don sla bad kam beaiñ da ka MIDC naka liang ka seng kan dang ïai buddien ban leh ïa kaba donkam.
