Duh leit skul ki khynnah naba ktieh palat ka surok ha Umkiang, kyrshan ka SSSU ïa ka jingïakhih ka KSU

Khliehriat, Nailur, 20: Ka Seng Samla Shnong Umkiang, ka ai ka jingkyrshan ba pura ïa ka Khasi Stidents Union East Jaiñtia Hills District Unit kaba yn sa khot pynlong da ka jingiakhih paidbah na ka daw ka jingleh mynthi ka sorkar bad ka NHAI ha kaba iadei bad ka jingjot jingjulor palat ka surok national highway ha East Jaiñtia Hills District.
“Halor kane ka mat kaba ïadei bad ka jingsniew palat ka surok, ka seng samla shnong Umkiang ruh ka sngewkhia jur haduh katta katta namar ka jingsniew ka surok ka la long shaba palat pud kata naduh Tuber Shohshrieh shaduh Malidor, “Khamtam ngi ki paidbah kiba ïaid lyngba na kane ka surok ngi ju mad ïa ki jingeh jingjynjar khamtam haka por ba pang ba shitom ban pynpoi ïa kiba shitom sha ki jaka ban ai jingsumar ba kyrkieh” ong u kyrwoh.
La ong ruh ba kane ka jingleh bym suid ñiew ka NHAI bad ka sorkar ban maramot ïa kane ka surok ka buh ïa ki paidbah ba bun ba lang ha ki jingeh ha ka leit ka wan.
Ha kajuh ka por, ka Seng Samla Umkiang ka pynpaw ka jingsngewsih namar ki khynnah skul ha Umkiang ki hap ban iaid na ka lynti kaba dap da ka ktieh ha ka por ba slap bad da ka pum pum ba jur ha ka por bym don slap, don ki khynnah kiba hap ban leit phai noh sha ïing ruh na ka daw ba la ktieh lut ki Uniform skul.
Kane ka jinglong jingman ka surok ka la pynbitar haduh katta katta ïa ka Seng Samla Shnong Umkiang bad wat ïa ki kmie ki kpa jong ki khynnah skul ruh haduh ba ki khun jong ki ki hap ban duh wat ban leit sha skul, ong u kyrwoh ba la phah da u President jong ka Seng Samla Umkiang u Ma Ellend Mynthlu.