La donkam kyrkieh ban wanrah da u 132kv Sub-Station ba lip bording khah khah ha Ribhoi; Dawa ka RBYDSO

Nongpoh, Nailur, 20: Ki nongïalam ka Ri-Bhoi Youth Developmental & Social Organization (RBYDSO) mynta ka sngi ki la mih shakhmat ban kyntu ïa baroh ki nongmih khmat ka Ri-Bhoi ba kin kren lem haka ïing dorbar naka bynta ki jingeh ba ki paidbah ki mad haka thaiñ Ri-Bhoi ha kaba ïadei bad ka bording elektrik kaba la wan rah shisha ïaka jingeh naka bynta ki paidbah kiba pyndonkam ïaka khamtam lei ki khynnah skul kiba don hapdeng ka jingpule.
Haba kren sha ki lad pathai khubor u Samla Kerbok Malai Secretary ka Ri-Bhoi Youth Developmental & Social Organization ha ryngkat ka jingïadon lang u bah Givinson Lyngkring, Asst. Secretary u la ïathuh ba ka ba sor Nongpoh kaba dei ruh ka Head Quater jong ka Ri-Bhoi ka la don kam da u 132KV Sub-Station ban pynbiang ïaka bording bad ruh ban lah ban sam sha ki shnong namar kumba long mynta la sam bording tang da u 33kv sub-station kaba la buh jingeh shisha ïaki paidbah ka dong bad ka thaiñ.
U la ong ruh ba ka thaiñ Ri-Bhoi Sepngi, Umden, Umsaw Nongbri haduh mynta ki dang pyndonkam da u 11KV line bad kala dei ka por ban kyntiew ruh ïakine sha ka 33 KV ba ka bording kan long kaba thikna bad ba ki paidbah kin nym mad jingeh naka jinglip bording khah khah.
Shuh shuh naka liang ka seng kala lap ruh ba ka tnad sam bording ka don ruh ka jingeh ha kaba ïadei bad ka jingduna ki nongtrei kumba la pynpaw da ki bor bahalor hadien ka jingleit kynduh ka seng bad dei halor katei ka nongrim ba kum ka seng ka kwah ba ka bording elektrik kan long kaba thikna ha ka dong Ri-Bhoi bad kyntu ruh ba ki MLA ki dei ban rah ïa katei ka mat ha ïing dorbar haka dorbar synrai kaba dang ïaid mynta naka bynta ka jingbit jingbiang jong ki paidbah.