Mairang, Nailur 20: Ka Hynñiewtrep Youth Council North West Khasi Hills, ka la dawa ïa u Deputy Commissioner ka Eastern West Khasi Hills Bah Gideon Kharmawphlang, ban khang lut noh ïa ki jingpynlong ïa ka jingïakop khwai dohkha hapoh ka District.
Ka HYC NWKH hapoh ka jingïalam u General Secretary Shembor Langrin, ka la leit ïakynduh ïa u DC ha ka 19 tarik Nailur ban buh ïa kane ka jingdawa. Kane ka jingdawa ka la mih ruh hadien ka jingjia ba sngewsih kaba wan hap ha kawei ka longkmie kaba la duh noh ïa I Khunlung ba dang shu kha, tang na ka daw ka jingdheng kali kaba jur, kaba la mih na ka tamasa khwai dohkha ha Pamphyrnai, Ksehkohlong, West Khasi Hills, myn ha ka 16 tarik Nailur.
Une u Nongïalam ka HYC u pyntip ba u DC u la ïathuh ba u la dep phah da ki jingthoh sha baroh ki nongpynïaid ïa ki jingïakop khwai dohkha hapoh ka District, ba ki dei ban bud ïa ki 7 tylli ki kyndon ba la buh da ki bor pynïaid District ban pynlong ïa ki jingïakop khwai dohkha.
U pyntip ba ki bor District ki la buh ruh ïa ka kyndon ba lada ki nongpynïaid ki pynkheiñ ïa ki kyndon, u DC u lah ban khang noh ïa ki jingïakop khwai dohkha.
Halor kane, ka HYC ka la kyntu ïa ki nongpynïaid ïa ki jingïakop khwai dohkha ba ki dei ban bud ryntih ïa ki kyndon ba la buh da ki bor District khnang ba kan ym ktah ïa ka ïaid ka ieng ki paidbah.
