Nongpoh, K’Lyngkot 06: Ka jingtuid ki nongñiah thuk thuk naka jylla Assam bad kumjuh ruh na nongbah Shillong man ka sngi u Blei ban pynlong kum ka jaka ïa pynher bad stunt ïaki thuk thuk 2 shaka kala long shisha ka jingma kaba khraw ïaki paidbah kiba leit ba wan ha shilynter jong u surok bah National Highway ha Ri-Bhoi District bad wat ka jingim jong kito kiba ju mlien ban leh stunt ha surok bah ba ki kali ki ju leit ju wan.
Kiba bun naki paidbah ki ju ud halor ka jingtuid ki nongñiah ar shaka man ka sngi u Blei, namar ka jingsawa kaba jur kaba pynthud ïaki paidbah kiba ju long jingïaseng, bad khamtam ka jingsyier namar ka jingpynher sted bad ka jingbym kheiñ snep ïaki kali ba leit ba wan.
Namar ka jingtuid palat jong ki nongñiah thuk thuk naka liang ki bor pulit jong ka Umsning Police Station hynnin ka sngi u Blei kila pynlong da ka jingtalasi ïaki nongñiah ar shaka ha haka thaiñ Umsning Bye Pass haka jingïatreilang bad ka seng HynniewTrep Integrated Territorial Organization Umsning Circle hapoh ka jingïalam u Samla Bankit Kyrsia bad u Samla Marius Malai Secretary HITO Ri-Bhoi District bad haka jingtalasi jong ki pulit la lap ba bun naki nongñiah ar shaka kim burom ïaki aiñ ñiah kali ban deng ïaki helmet, bad wat ki license nalor ka jingpynher sted kaba la palat kaba lah ban wanrah ka jingjia ba sngewsih ha kano kano ka por.
Shuh shuh naka liang ki bor pulit bad kumjuh ruh ka seng HITO kila kyntu ïaki samla kiba ju mlien ban pynlong jaka stunt bike ha surok bah National Highway ba kim dei ban pynlong kum ka jaka lehkai ïaka surok bah ba ki kali ki leit ki wan bad khamtam ïaka jingim ba kordor jonglade bad kumjuh ruh jong kiwei.
