Pyndam noh ka jingthungkam ki 82 ngut naba khlem ïaid katkum ka polisi thungkam, CAG

Shillong, K’ Lyngkot 06: Ka Khasi Hills Autonomous District Council (KHADC) ka la shah kyntu ban pyndam noh ïa ka jingthung ïa ki 82 ngut ki nongtrei na ka daw ba ka khlem ïaid katkum ka rukom thungkam thungjam ne recruitment policy.
“Ka jingbym bud ïa ka recruitment policy ka thaw lad na ka bynta ka jingleh shilliang haba ïadei bad ka jingthungkam. Khnang ban pyndon ïa ka jingïakob kaba beit na ka bynta ka jingjied ïa ki kyrtong kiba dei hok ban ïoh, ka Council ka lah ban bud ïa ki recruitment rule. Kine ki jingthungkam, naba pynkheiñ ïa ki kyndon la jong ka Council, kumta dei ban pyndam noh (anulled/cancelled),” ong ka kaiphod u Comptroller and Auditor General of India (CAG) ha ka snem mang tyngka kaba 31 tarik Lber, 2019.
Katkum ka KHADC Service Rules, 1961 ka khmih halor ka kam thungkam bad ka kyntiew kyrdan jong ki nongtrei ka KHADC.
Ka Rule 3 da kaba shai ka la bthah ba ka jingthung ïa baroh ki jaitkam bad ïa ki nongtrei dei ban leh hadien ka jingpynmih ïa ka advertisement bad da ka competitive examination ne da ka nongrim ka eksam da ka ktien ne oral examination bad interview.
Hadien ba la khmih bniah ïa ki kot ki sla ka pyni ba ka KHADC ka la thung kumba 82 ngut ki nongtrei (permanent) ha kiba bun tylli ki kam.
La lap ba kine ki 82 tylli ki kam ba lait khlem da la pynmih ka jingpynbna. Ïa ka jingthung kam la leh tang da ka jingmynjur jong ka Executive Committee khlem da pynlong ïa ki eksam ne interview bad kiwei, ong ka kaiphod.
Ka KHADC ka la pynlut ïa ka pisa kumba T. 1.06 klur ha ka snem 2017-19 na ka bynta ban siew tulop bad ki allowance jong kine ki nongtrei.
Ha kawei ka liang, ki daw na ka bynta ka jingthung ïa kine ki nongtrei khlem da pynlong ïa ki eksam ne interview bad ka jingdon ki kam ba la mang pyrshah ïa iwei iwei i nongtrei kim shym la don hapoh ka record ne ban pyni na ka bynta ban leh ïa ka audit wat hadien ba la pan, ka la ong.
Secretary ka Executive Council, KHADC ha u Nailar 2022 la ong ba katkum ka kyndon ba don hapoh ka Sub-Rule IV of Rule 2 ka chapter-I ka KHADC Service Rules, 1961, ka “Appointing Authority” ka mut ba ka Executive Committee ne kano kano ka bor ba la pynkhamti da ka ban pyndep ïa ki kam thungkam ïa kum ki jaitkam ai jingshakri, ki grade ne post katba shah ka kam.
Shuh shuh ka Sub-Rule XI of Rule 2 ka Chapter-I jong ka kane ka Rule ka la ong ba ka “Committee” ka mut ka Executive Committee jong ka District Council ka United Khasi Jaiñtia Hills.
Ka Rule 12 jong ka Chapter III jong katei ka Rule ka la ban jur ba baroh ki jingthung kam sha ka Council services, classes III & IV dei ban leh da ki bor kiba la bthah hapoh ka hukum kyllum jong ka Committee.
Halor kitei ki Rules, ka jingthung ïa ki 82 ngut ki nongtrei kum ka Sub Inspector Tax, JAA bad kiwei, la mynjur da ka Executive Committee, KHADC haba ïadei bad ki jingthylli kine ki kam.
Shuh shuh ka jubab ka KHADC ba la aiti ha u Risaw 2023 ka la kdew ba na ki 66 ngut ki nongtrei ba la thung ha ka snem 2018-19 tang 8 ngut la thung halor ka nongrim ka compassionate ground katba 7 ngut la thung halor ka jingshong thait ki kmie ki kpa bad kiwei pat ki nongtrei la thung khlem da pynlong ïa ki competitive exam.
Ka jubab na u CAG ka ong ba kane ym lah satia ban pdiang ïa ka jubab ka Council namar ka Rule 3 of Chapter III of General Rules kaba la thaw na ka bynta ka thungkam bad kyntiew kyrdan ka kdew ba ka jingthung kam ïa baroh ki classes of services bad ki nongtrei, laitnoh ki compassionate ground ne invalid pension case, dei ban leh hadien ka advertisement bad da kaba pynlong ïa ka competitive examination ne halor ka oral examination bad interview.