Pyrshah ka Seiñraij Jowai ba thmu plie ïa ka University ha ka dur ka jinglehniam Khristan

Jowai, K’Lyngkot 06: Ka Seiñraij Jowai ka pynpaw ka jingpyrshah jur halor ka jingkren u myntri ka tand pule puthi ka sorkat jylla u Rakkam A. Sangma halor ka jingthmu ban pynlong ïa ka prokram baheh daka jingduwai pynkyntang (Christian Prayer Service) ne haka dur jong ka jinglehniam Khristan, haka sngi plie ïa ka University ba nyngkong hapoh ka jingpeit ka sorkar jylla kaba la tip kum ka Captain Williamson Sangma State University ka ban long haka 13 tarik u Kyllalyngkot, 2025.
Halor kane na ka liang ka Seiñraij ka pyrshah jur ïa kane ka jingthmu ban pynlong ïa ka prokram sorkar ha ka dur jong ka jinglehniam Khristan, da kaba ong kane ka jingkren u Myntri sorkar ka long kumba wanrah ïa ka jingsngew ïapher niam ne ïaidlait katkum ka Article 25 & 26 jong ka Constitution baroh ki ka Ri.
Ha ka juh ka por ka Seiñraij Jowai ka pynpaw ka jingsngewkmen ba ka sorkar kala lah ban pynkiew shuh shuh ïa ka jingnang jingstad hapoh ka jylla lyngba ka jingdon kum kine skulbah University bad kiwei de kiba kynthup ïa ka koit ka khiah bad ki kam ïalehkai Sports. Kumta ka Seiñraij ka pynkynmaw ba ka sorkar ka dei ban burom lang ïa kiwei pat ki jait niam hapoh ka jylla.
Na ka liang u President ka Seiñraij Jowai u ma H. Toi ha ka jingkren sha ki lad pathai khubor ha kane ka lah sngi U Blei ha ophis treikam jong ka Seiñraij kaba don ha Loompyrdi Iongpiah Jowai, ula ong ka jingplie pyndon burom ïa katei ka University ha ka dur jong ka jinglehniam Khristan ka long kumba ka sorkar kam kheiñ shuh ïa ki riewngeit kiba dang bat ïa ka ñaim tynrai jong ka riti ka dustur.
Halor kane ka Seiñraij Jowai ka pynpaw ka jingsngewsih ïa ka jingkren u myntri ka pule puthi ka jylla u Rakkam A Sangma namar kane ka lah ban wanrah ïa jingsngewniam hapoh ka jylla la ong u ma Toi.
Shuh shuh ula ong ka Ri India ka dei ka Secular State kaba pdiang bad burom ïa baroh ki jaitniam ha ki rukom ka jingngeit, kumta u buh ka jingkyntu na u Myntri Rangbah duh ka jylla u Conrad K. Sangma ba un shimkhai ïa kane bad ka jingpynbeit kloi ïa kane, khnang ba kan nym mih kano kano ka jingeh hadien habuh bad ban lait na ka jingïajngai hapdeng ki jait niam bapher bapher.
U la pyntip ruh na ka liang ka Seiñraij kala dep pynkhreh ïa ka jingthoh ban phah sha u Myntri Rangbah ka jylla na ka bynta ban pynbeit ïa kane kaba long ka jingmyntoi lang jong kiwei de ki riewngeit hapoh ka jylla.