Kut noh ka jingleit ki nongthoh khubor ha ka Maha Kumbh Mela 2025

New Delhi, K’ Lyngkot 23: Ka kynhun jong khatsaw ngut ki nongthoh khubor na ka thaiñ shatei lammihngi ka la sakhi ïa ka jingkhraw jong ka Maha Kumbh Mela 2025 ha ka nongbah ba kyntang jong ka Prayagraj. Ki nongthoh khubor ki ïashim bynta ha ka Press Tour hapoh ka jingpynïaid jong ka Press Information Bureau bad ka sorkar Uttar Pradesh.
Ki nongthoh khubor ki la ïashim bynta ha ka jingleit ban ïohi ïa ka jingïakynduh lang ba kyntang jong ka wah Ganga, Yamuna bad ka Saraswati. Ka kynhun ka la leitjngoh ïa bun ki jaka ba kyntang ban sngewthuh ïa ka jingkongsan jong ka kane ka kam bad ka jingïar ki jingpynkhreh na ka bynta ka jingïalang kaba heh ha kylleng ka Mela.
Ka Maha Kumbh 2025 kaba khring ïa ki briew na kylleng ki ri, ka pynbiang ka rynsan ïa ki nongthoh khubor ban ïoh jinghikai shaphang ki rukom, ki pilkrim bad kumjuh ruh ki Sadhu, ki Naga Sadhu, kiba im ïa ka jingim kaba kyrpang bad kaba long ka bynta kaba heh ha kane ka kam.
Ha kane ka jingleit, ki la leit jngoh ïa ka Uttar Pradesh Darshan Mandapam, ka exhibition ba la buh kyrpang da ka sorkar Uttar Pradesh, kaba pyni ïa ka deiriti jong ka jylla, ka jingngeit ba kyntang, bad ka pateng ba ïadei bad ka histori. Ki la leit jngoh ruh ïa ka Ka lagram, ka jaka pdeng jong ka jingsaiñdur bad ka deiriti kaba pyni ïa ka jingriewspah ka kam shna tiar jong ka India bad ki dustur tynrai ba ïar ba la buh da ka Tnad Deiriti, Sorkar India.
Ka Ka lagram ka pynbiang ka rynsan ïa ki barikor ban pyni ïa ki sap ba tbit jong ki bad ka deiriti kaba la hyndai. Ka wanrah lang ïa baroh ki barikor hapoh kawei ka rynsan.
Shuh shuh, ka 5 D Exhibition ba la tip kum ka “Immersive Cultural Experience” la kynthup lang kum shi bynta jong kane ka jingleit ki nongthoh khubor. Ka ïathuh ïa ka khana shaphang ka Ganga Avtaran bad ka Samudra Manthan, ka khana kaba la pyni lyngba ki dur ba 360 degree, ki sur bad ka teknoloji katkum ka juk mynta.
Ka North East Zone Cultural Centre (NEZCC) ka la buh ïa ki stall ban pyni ia ki tiar tynrai bapher bapher kum ki tiar ba shna na u siej, ki saree silk jong ki Assamese, ki mask ba shna da kti, ki jingdeng jong ki riewlum bad shibun kiwei kiwei.
Ka Kumbh Mela ka khring ïa million ki pilkrim na kylleng ka ri bad na shabar ri. Kane ka jingïalang ka long kaba kongsan na ka bynta ka jingïasam ïa ka deiriti bad ka jingai jingtip lyngba ki media, bad kane ka Press Tour ka dei ban ai jingtip kyrpang shaphang ki jinglong jingman jong ka jingngeit ha India ïa ki nongthoh khubor na ka thaiñ shatei lammihngi. Ki la sakhi ka jingpyni ïa ka jingngeit, ka jingaiti bad ka jingïatylli ha ka Kumbh Mela.
Ha kaba ïadei bad ki jingshem ha ka niam bad ka deiriti, ka Press Tour ka long kum ka rynsan ïa ka jingïadei bad ka jingkyntiew ïa ka jingïatreilang hapdeng ki lad pathai khubor na ka thaiñ shatei lammihngi bad kiwei kiwei ki bynta jong ka ri, kaba ai jinghikai ïa ka jingkongsan ka Kumbh Mela ha ka deiriti bad ka jingngeit jong ka India.
Kane ka sienjam jong ka sorkar Uttar Pradesh bad ka PIB North East ban kynthup ka jingïashim bynta ki nongthoh khubor na ki thaiñ bapher bapher jong ka India ha kum kane ka jinglehniam ba kyrpang ka kdew ïa ka jingkongsan ban pynkhlaiñ ïa ka jingïatylli jong ka ri bad pynthikna ba man ka bynta jong ka ri ki mihkhmat ha kum kine ki jinglehkmen ba khraw jong ka jingngeit bad ka deiriti.
Katto katne ki nongthoh khubor ki la leit ban ngam ha ka Triveni Sangam, ka jingïakynduh ba kyntang jong ki Wah Ganga, Yamuna bad ka Saraswati.
Ki nongthoh khubor ki la pynkut ïa ka jingleit jong ki mynta ka sngi. Kin sa ïasam ïa ki jingshem jong ki bad ki jingsngewthuh bad ki nongpule jong ki, kaba ban jur ïa ka jingïatylli hapdeng ka jingïar kaba batai ïa ka jingngeit jong ka India.