Kut noh ka jingïalehkai ki Sub-Junior ha ka 2nd NTPC National Ranking Archery Tournament (NRAT) 2023

23-24 tarik jong ki Junior, 26-27 tarik jong ki Senior

0

Shillong, Lber 22 : Ka lympung ïalehkai siat khnam kaba la tip kum ka 2nd NTPC National Ranking Archery Tournament (NRAT) 2023 jong ki Sub-Junior ka la poi noh sha kaba kut ha ka liang ki sub-junior ha ka sngi Ba ar, ha Archery Ground kaba don ha SAI, NEHU Campus.
Ïa katei ka lympung siat khnam ba la pynlong da ka Archery Association of Meghalaya kaba la sdang naduh ka 19 tarik haduh ka 27 tarik Lber 2023 la wan ban plie pyrda da u Pramod Chandurkar uba dei u Secretary General jong ka Archery Association of India kum u kongsan ha ka jingïadonlang u Upendra Mishra, DGM na ka NTPC bad u Rajendra Singh Tomar, Treasurer, jong ka AAI.
Ka jingïalehkai jong ki Sub Junior ka la sdang ha ka 20 tarik bad kut ha ka 21 tarik Lber 2023 ha kaba la sam ruh ïa ki khusnam nam jop ha kaba u Devraj Mohapatra u rang siat khnam jong ka Jylla Meghalaya u ïoh ka takma Rnong ha ka kyrdan ba lai ha ka Sub Junior Boys jong ka Recurve Division.
Katba uba jop takma Ksiar udei u Shivam Rajendra Chikale jong ka Maharashtra bad u Mudit jong ka jylla Haryana u ïoh ïa ka takma Rupa ha ka kyrdan kaba ar. Ha ka liang ki khynnah kynthei, ïa ka nam jop ba nyngkong la ïoh da ka Anisha Das jong ka Assam, ka Laiphrakpam Rabina Dev jong ka Manipur ïa ka nam ba ar bad ka Mainsha Choudhary jong ka Rajasthan ïa ka nam ba lai.
Ha ka kyrdan Sub Junior Compund Boys, ïa ka nam ba nyngkong la ïoh rah da u Raj Chattar jong ka jylla Jharkhand, ïa ka nam ba ar la ïoh ra da u Abhi Khatri jong ka Delhi bad ïa ka nam ba lai la ïoh rah da u Elangbam Lamnganba Singh jong ka Manipur.
Ha ka ka liang ki kynthei, ka Ekta Rani ïa ka nam ba nyngkong, ka Tanishka Bhatia ïa ka nam ba ar bad ka Kumud Sainai ïa ka nam ba lai, baroh lai ngut kidei jong ka kynhun ïalehkai na Delhi.
Katei ka lympung kan bteng biang ha ka 23 tarik bad 24 tarik ha ka kyrdan jong ki Junior bad ka kyrdan jong ki Senior kan sdang ha ka 26 tarik haduh ka 27 tarik Lber 2023.

Leave A Reply

Your email address will not be published.