Balei Lat u khlem kren eiei halor ka jingwan rung kyrthep ki mynder bad kiwei ki mat

Shillong, Lber 21 : Ki MLA jong ka Liang Pyrshah kila pynpaw ka jingsngewkhia halor ka jingbym kynthup u Lat ha ka jingkren lamphrang jong u hynnin ka sngi halor ki mat kiba bun bad kiba donkam ïa ka jylla.
U Dr. Celestine Lyngdoh, MLA ka Congress, uwei na kiba la wanrah ïa ka amendment mition halor ka jingkren lamphrang u lat, u la ong ba u Lat um shyn la kren eiei halor ka jingwan rung kyrthep ki mynder, ka jingshongshngaiñ ki paidbah ha khappud, ka jingkyntiew ïa ka pule puthi ha ki College, ka jingkyntiew kyrdan ïa ki jaka sumar, ka jingbym lah treikam ka MeECL, ka jingpynslem ïa ka Medical College, ka jingbym treikam bha ka skhim JJM, ka jingshah lehbeiñ ki ASHA bad ki nongtrei Anganwadi Centre bad ka jingtreikam kaba khuid jong ka sorkar.
“Ka jingkren lamphrang u Lat kam shym la kdew satia ia ki sienjam bala shim da ka Sorkar ban leh eiei halor ka jingrung ki bar jylla, ka jingshngain bad jingiada ia ki paidbah ba sah ha khappud” ong u MLA ka Congress na Umsning Dr Celestine Lyngdoh haba iashimbynta ha ka jingiatai ia ka jingkren u Lat.
Ha kaba ïadei bad ka jingïaai ïashim khappud hapdeng ka jingïapynbeit pud ka Meghalaya bad Assam, u Dr. Celestine, u la ong ba ym dei satia ban ïabujli da ki jaka bym don jingïakajia kuba la jia ha Maiphuli Plillangkata ha kaba ka jingïakajia kadei ïa u lum jingtep, hynrei la ïabujli pat da ka pung dohkha. U la ong ba dei ban ïa bujli beit da ki jaka ba don jingïakajia.
U MLA ka Umsning u la pynpaw ka jingsngrewkhia ïa ka jingbteng ka jingkhaïi dewïong beaiñ kaba dang ïai bteng haduh mynta. U la ong ba kumno ki Pulit ki lah ban lap ne kem ïa ki nongkhaïi drok kiba rah 500 Gram ne 1000 Gram, katba ïa ki trokkit dewïong kiba kit shi trok bad bun tylli ruh ki Pulit kim lap satia.
U MLA ka VPP na Nongkrem Bah Ardent M Basaiawmoit ula ong ba u Lat ka Jylla u khlem kren eiei halor ka kam ban pynrung ïa ka ktien Khasi ha ka khyrnit ba phra jong ka Riti Synshar ka Ri India.
Ula kynnoh ruh ba ha kine ki san snem bala leit, ki paidbah kila im ha ka jingtieng bad la pynbor ruh ïa ki briew ba kin shim ïa la aiñ hala ka jong ka kti haba ai nuksa ïa ka jingjia ha kaba saw ngut ki runar kila shah bomïap ha ki paidbah ha Shangpung, West Jaintia Hills District.
Halor ka kam khappud, u Bah Ardent ula ong ba ka Sorkar kam dei ban ai ei ia ka jaka ba kordor sha ka Assam ha ka kyrteng jong ka jingiapynbeit pud.
Ula ong ba khlem pep, ka kajia khappud ka dei ia kaba hap ban pynbeit hynrei bun ki shnong ha ri-lum Khasi kila leit sha Assam namar ka MoU.
Haba ïaroh ia ka jingtrei shitom jong ki Pulit ban ïakhun ïa ka thma pyrshah ïa u droks ha Jylla, u Bah Ardent ula kdew ïa ka jingdonkam ban leh tyngeh ïa ki nongkhaii droks bad pynthikna ba kin shong slem bha ha along da kaba pynngat ha kyndon aiñ MPDA.
Ula kyntu ruh ïa ka Sorkar Jylla ban buh noh ïala ka jong ka rehab centre haba buh ha ka jingmut jingpyrkhat ba ka jingsumar ïa kiba la ngop ha u droks ka dei kaba rem dor bha bad ka dei ka jingeh ia kiba bun ki Kmie ki Kpa.
Une u Nongialam ka VPP ula ai jingmut ia ka Sorkar ban pyniadon bynta ia ki stad ki jhad jong ka Jylla ha ka State Education Commission.