Ka elekshon kam shym la long kaba khuid, namar jur ka jingtheh pisa, ong Bah Ardent
Shano jah ka jingpynrung ïa ka Ktien Khasi bad Garo?
Shillong, Lber 21: Haba kynthoh ïa ka jingkren lamphrang u Lat u Phagu Chauhan hynnin ka sngi ha Ïingdorbar ha kaba u la ong ba ka elekshon MLA 2023 ka long kaba ïaid beit bad kaba khuid, u Bah Ardent Miller Basaïawmoit, MLA ka Nongkrem, u la ong kam shym la long ka elekshon kaba khuid bad kaba ïaid beit namar ka la don ka jingtheh pisa kaba jur ha kiba bun ki jaka.
“Nga te ngam ong ba kadei ka elekshon kaba khuid namar ka jingdon jingtheh pisa bad ka diang bad ka mon”,la ong u President ka VPP.
Lah ban kdew hangne ba ka VPP ka la leit sha ki paidbah ha ka elekshon 2023 da kaba tyrwa ban ïakhun pyrshah ïa ka bor pisa bad ka jingbamsap.
Haba ïashim bynta ha ka jingïatainia halor ka jingkren lamphrang u Lat, u MLA ka Liang Pyrshah u la ong ba ka suk ka saiñ ruh kam shym ka la long kumba la kren da u Latm namar ka la don ka jingïapynïap, ka jingthombor ha kine ki san snem baladep. U la ai nuksa da ka jingshah bom ïap ki saw ngut ki briew ki thaiñ Shangpung, ha kaba ki paidbah ki la shim ïa aiñ ha ka kti. Nangta u la kdew ruh ïa ka jingshongsyier ki paidbah kiba shong ha ki jaka khappud, ha kaba u la pyni ïa ka nuksa ïa kaei kaba la jia ha Mukroh.
U Bah Ardent u la kren bun ruh ki mat ha ka por kaba la buh da u Lamphang kaba long shiphew minit da kaba u la ïasaid ruh na ka bynta ka jinglehbeiñ ka sorkar ïa ka MCCL kaba long kawei na ki karkhana kaba la ai jingmyntoi ïa ka Sohra. “Na kyntu ïa ka sorkar ba kan peit lem ïa kane ka karkhana,namar ki nongtrei ki la shu trei khlem tulop bad ngam sngewtynnad ba ka sorkar kan shu pynim da kaba aiti sha ki Private Company lyngba ka Joint Venture”, u la ong.
U MLA Nongkrem, u la kren bynñiaw ruh halor ka jingsniew ka surok ban leit sha Sohra, ha kaba ki paidbah ki la ud ba wat haba la mang pisa 12 klur ki dang bun ki jaka ki ym pat pynbha.
U la buh jingkylli ruh halor kata ka jaka pynsangeh kali ba long automatic system ha Motphran kaba haduh mynta ym pat ïohi eiei satia.
U Bah Ardent u la ïasaid ruh na ka bynta ka jingpyntreikam noh ïa ka Penshon ki nongthoh khubor bad kumjuh ruh ka jingsiew biang por ïa ki Advertisement jong ki kot khubor bad ka jingpynkhlaiñ shuh shuh ïa ka jingtreikam ka tnad Information and Public Relations.