Lada ïa u drok lah ban kem balei ïa ki trok kit dewiong tuh ym lap dien ki pulit : Dr Celestine

Shillong, Lber 21 : U MLA jongka Umsning u Dr Celestine Lyngdoh u la bun ka jingkylli halor ka jingbym lap dien ki pulit ïa ki trok kit dewiong tuh ha ka jylla da kaba u ong lada ïa u Drok ki pulit ki lap dien beit wat la da dei tang khyndiat eh ruh, na kaei ka daw ïa ki trok kit dewiong beaiñ kiba 16 shaka ym lah ban lap dien da ki pulit.
“ Hato ngi lah ban kylli ba ki pulit ki tbit ban trei tang ha ki kam ba ki don mon ban trei? Lada ki long kiba tbit ha baroh ki bynta ba la buh ïa ki ban trei, ngam lah ban sngew thuh balei ïa ki trok kit dewiong beaiñ kim lap dien?” kylli u Dr Celestine.
U la ong “ Nga kwah ruh ban tip katno ka sorkar ka la ïoh lum khajna na u dewiong baroh shisnem bad nga kyrpad ruh ïa ka sorkar ban tih dewiong noh kat kum ka jingstad saian khnang ban myntoi ka jylla”.
U la ong ba um shym pyrshah ïa ki heh saipan khaïi dewiong, “ Nga burom ïa ki namar haba ka jylla ka mad ïa ka jingeh na ka jingkyrduh kam kyrduh jam ki don kine ki heh saipan kiba tih bad khaïi dewiong bad kiba ai kam ai jam ïa ki briew hynrei ka jingkylli ka long hato ngi lah ban ïai bteng sah kumne da kaba ngin shah ïa ki katto katne ban leh ïa kine ki kam khaïi dewiong beaiñ kaba ktah pat ïa ka jylla?”.
U la ong ba ka Constituency jongu ka don hapdeng ka surok bah kumta “ Lada ka sorkar ka ong ba ym don kata ka jingtih bad jingkhaïi dewiong beain ka long kaba eh ïa nga bad ïa ki paidbah jong nga ban ong ba kam don ka jingshalan tuh ïa u dewiong namar ngi ïohi ïa ki trok ba kit dewiong pylleiñ pylleiñ man la ka sngi. Ka jingkylli ka long katno kiba shu kit tuh ne kit beaiñ bad katno pat kiba kit da kaba ïoh jingbit ne don ki kot ki sla kiba biang”.
Ha kaba ïadei bad u pud u sam, u Dr Celestine u la ong ki don sa hynriew tylli ki jaka ba dang don hapdeng ka jingïakajia. Kumta kumba la mad ïa kaei kaba la jia na ka jingïapynbeit kaba nyngkong da kaba u la kynnoh ruh ba ka don ka pung dohkha ha Maikhuli kaba ym dei kaba ju ïakajia bad ka Assam hynrei ïa kane la ai noh sha ka Assam. Kumta u la ong haba ïa ai ïashim kylliang dei ban ai tang ïa ki jaka ba don hapdeng ka jingïakajia ym dei satia da ki jaka bym ju ïakajia mynno mynno ruh.
U la kyrpad ruh ïa u Lamphang ba um dei ban ailad ba kan jia biang kum ka jingjia ha ka Lah Sngi U Blei ha kaba saw ngut ki MLA ka VPP ki la mih jyndat noh napoh ka ïing dorbar namar ki pyrshah ba u Lat u kren ha ka Hindi.
“ Kumba ka BJP ka synshar ha ka sorkar pdeng kumta nga kyntu ba haba ki thung ïa u Lat ki dei ban da tohkit ba u dei u ba nang ban kren bad ka English khamtam hangne ha Meghalaya” ong u Dr Celestine.