Shillong, Lber 21: U Myntri Rangbah, u Conrad Sangma, u la kyntait ban kynthoh halor ka jingkynnoh bamsap da u Myntri Rangbah Duh ka ri, u Narendra Modi bad u Myntri Korbar Ri, u Amit Shah ha ka por ba ki wan ïalap elekshon sha Garo Hills ha u bnai Rymphang mynta ka snem.
Haba jubab halor ka mat jingïatai ba la wanrah da u Bah Adelbert Nongrum, MLA ka VPP hapoh ïingdorbar Thawaiñ mynta ka sngi halor ka jingkynnoh kine ki arngut ki hehduh ka sorkar pdeng ba ka Meghalaya kadei ka jylla ba bamsap tam, u Conrad u la ong ba um kwah ban ong eiei halor kane jingkynnoh jong ki ha ka por elekshon, namar ba kine ki arngut ki la don lang pat ha sngi ba ka sorkar MDA 2 ka la shim smai ha Raj Bhavan.
“Ka BJP ka don lang bad ngi ha ka sorkar mynta bad kine ki arngut ki nongïalam ka sorkar pdeng baroh arngut ki wan ruh ha ka sngi ba shim smai ka sorkar ba mynta, kaba long ka sien kaba nyngkong eh ba u PM bad u HM kin ïadon lang ha ka sngi bam smai”, la ong u Conrad hapdeng ka jingthap miej, ki dkhot ka Liang Synshar.
U la ong ba kane ka pyni ba ka sorkar pdeng ka don ka jingshaniah ïa ka jingtreikam jong ka sorkar ba la ïalam da ka NPP ryngkat ka jingïatreilang kiwei pat ki Party.
Ha kajuh ka por u Conrad u la kdew ruh ïa kiba bun ki kam pynroi bad ki projek ba la pyntrei da ka sorkar MDA I, naduh ka umbam umdih, ha kaba ka jingpyntreikam ïa ka skhim JJM ka la ïoh ïa ka jingïaroh na ka sorkar pdeng. Nangta ka skhim PMGSY ruh ka sorkar pdeng ka la ai ka jingïaroh. Shuh shuh ka sorkar MDA I, ka la trei bun ki kam kiba la paw shabar bad kaba pynlong ïa ka sorkar MDA ban wanphai biang ha ka bor. “Kane kadei ka jubab kaba biang tam kaba u paidbah ka jylla u la pyni ïa ka jinglah treikam jong ngi”, la ong u Conrad.
Ha shuwa jong kane, u Bah Adelbert haba wanrah ïa ka mat jingïatai, u la ong ba ka long ka jinglehraiñ ïa ka jylla haba ki arngut ki hehduh ka sorkar pdeng haba ki ïalap elekshon ha Tura, Dalu bad Rangsakhona, kila kynnoh ba ka Meghalaya kadei ka jylla kaba bamsap tam. U MLA ka VPP uba la pynkylla pharengr ruh ïa ka jingkren jong ki, u kwah ban tip la ka sorkar u Conrad kan ujor da ka mukotduma ne kan leh kumno halor kane ka jingkynnoh jong ki, namar ka jingkren jong ki, ka la saphriang lut ha ri India baroh kawei.
U Dr. Mukul Sangma, MLA ka TMC, haba ïashim bynta ha kane ka jingïatai, ula ong ba ka ïingdorbar kadei ban wanrah da ka Resolution ban pyrshah ïa kane ka jingkren kine ki arngut bad ha kajuh ka por u la ong ba ka sorkar pdeng kadei ban da kdew ïa kita ki jingbamsap bad ba kadei ban phah tohkit da ki bor tohkit jong ka sorkar pdeng khnang ban lap ïa ka jingshisha bad ba ka jylla kan ïoh ban pynbeit.
