Thwet ki Pulit ïa ka kynthei ba dung tari ïa u Bah Zacharia Sohthiang hajan Hotel Pegasus
Shillong, Lber, 21: Tang hapoh khyndiat kynta ba ka khubor ka la saphriang ha ka rynsan jong ka Social Media halor ka jingshah dung tari jong u Bah Zacharia Sohthiang ha ki briew ki bym lah ban ithuh ha ka thaiñ Khyndai Lad ka la pynsah umdum ïa kiba bun halor kane ka jingjia.
U Superintendent of Police ka East Khasi Hills District u Dr. M.G Raghavendra Kumar ha u kyrwoh ba la phah sha ki lad pathai khubor u la ïathuh ba ha ka 19 tarik mynta u bnai ha ka por 6:30 baje mynstep la pyntip na PAB Civil Hospital ha kaba ïadei bad ka jingjia shah dung tari. Katkum u Ophisar uba la shah pynkhamti ban tohkit ïa kane ka jingjia la ïathuh ba u Bah Zecharia Sohthiang, 25 snem ka rta na ka shnong Mawtari Myrdon Umsning u la shah dung da ka tari ha ka por kumba 3:00 baje mynstep ha ka 19 tarik mynta u bnai ha Police Bazar ha ki briew ki bym lah ban ithuh kiba don haduh 3-4 ngut eiei.
“Ïa une u rangbah la pynkit noh mar mar sha NEIGRIHMS Hospital na ka bynta ban ïoh jingsumar da ka jingsynran lang jong ki Pulit,” la ïathuh u SP.
“La pynlong mardor ïa ka jingtohkit katba dang ap ïa ka jingujor ejahar na u lanot/bahaing jong u lanot khnang ban register case hapoh ka kam bymman. Ïa ka ejahar la ïoh pdiang hynin ka sngi Thohdieng na ka Kong Princy Sohthiang, ka hymmen jong u lanot (Zacharia Sohthiang) ha Sadar Police Station ha kaba ïadei bad ka jingjia bad la register case ha Sadar PS hapoh ka Section 326/307/34 Indian Penal Code (IPC),” la pyntip u SP.
“Naduh ka step jong ka 19 tarik mynta u bnai, u lanot (Zacharia) u la ai jubab kiba kyllaiñ ha kaba ïadei bad ka jaka jong ka jingjia, ka por ba la jia bad ha kaba ïadei bad ka dur jong kiba donkti,” ong u kyrwoh na u SP bad bynrap, “ha ka jingtohkit la shem ba u lanot u la kiew jubor ha kawei ka kali private ha Khyndai Lad hajan ka surok kaba mih sha Hotel Pegasus ha ka 18 tarik mynta u bnai ha ka por kumba 9:45 baje mynmiet bad pan jingïarap na ki saw ngut kiba shong hapoh kane ka kali ban ïarap pynwad lem ïa ka Scooty jong u da kaba u la kam ba u la aksiden ha Mawprem. Ynda la poi ha Mawprem, u Zacharia Sohthiang u la phla ha kine kiba shong hapoh kali ba u la shah dung tari bad kyrpad ïa ki ban ïarap leit buh lem ïa u sah sha jaka sah ba shipor ha shnong Mawshbuit, PS Madanryting. Ki saw ngut kiba shong hapoh kali ryngkat bad une u lanot ynda la poi ha ka shnong Mawshbuit ha ka por kumba 12:30 baje mynstep (19 tarik, Lber, 2023) la aiti noh ïa une u lanot sha ki arngut ki bahaing hasem jong u, kiba sah lang bad u.”
“Ha ka por 3:59 baje mynstep, uawei napdeng ki bahaing hasem u la pyntip sha ka EMRI halor kane ka jingjia bad kyrpad ban wan kit da ka kali Ambulance. Ïa u lanot la pynkit sha Shillong Civil Hospital ha ka por kumba 5:30 baje mynstep da ki arngut ki bahaing ha ka kali EMRI Ambulance,” la ïathuh shuh shuh u SP.
“Ha ka miet jong ka 21 tarik, Lber, 2023, u lanot, Bah Zacharia Sohthiang u la ai sakhi hakhmat u Investigating Officer (IO) halor kane ka jingjia da kaba ïathuh ba u la shah dung tari ha kawei ka kynthei bym tip hajan Hotel Pegasus bad ong ruh ba u ithuh ïa ka durkhmat jong kane ka kynthei,” la bynrap u kyrwoh.
“Kane ka jingjia mynta ka dang don hapdeng ka jingtohkit bad ka jingtrei shitom ban ithuh ïa ka durkhmat ban ban ïohlem ïa ka kynthei kaba donkti ka dang ïaid shakhmat,” la pyntip shuh shuh u kyrwoh na u SP.