Ka jingpyntreikam ka Sorkar ïa ka Roster System lyngba ka Office Memorandum ka long be-aiñ: HYC

By Mawphor News Desk On Mar 22, 2023

Shillong, Lber, 21: Ka Hynñiewtrep Youth’s Council (HYC) Central Executive Council ha ka sngi Baar ka la ong ba ka jingpyntreikam jong ka Sorkar Jylla ïa ka Roster System ha kaba ïadei bad ka jingthungkam da kaba pyntreikam ïa ka Office Memorandum kaba la pynmih ha ka 10 tarik Jymmang 2022 ka long kaba be-aiñ namarba ka long pyrshah ïa ki kyndon jong ka Reservation Policy.
Ha ka jingïakren bad ki lad pathai khubor, u General Secretary ka HYC u Bah Roykupar Synrem u la ong ba ka jingpyntreikam jong ka Sorkar ïa ka Roster System hadien ba ka la ïoh jingbthah na ka Meghalaya High Court (HC) ban pynkhreh ïa ka hadien ka jingshong bishar ïa ka Sou Motu ka la long kaba be-aiñ.
“Ka Ïingbishar ka la bthah ban pynkhreh ïa ka Roster System bad na ka lïang jong ka Sorkar ha ka 10 tarik Jymmang 2022 ka la mynjur ban pyntreikam ïa kane ka Roster System ha ka Reservation Policy lyngba ka Office Memorandum kaba la kdew ba ka jingpyntreikam ïa ka Roster System ha ka Reservation Policy katkum ka ‘point d” jong ka Office Memorandum la ong ba ka jingpyntreikam kan dei beit naduh u snem 1972 kaba long pyrshah ïa ka Resolution kaba la mynjur naduh u 1972,” u la ong.
“Lada peit ïa ka para 2 jong ka Resolution jong u snem 1972 ha kaba ïadei bad ka jingpyntreikam ïa ka Reservation Policy ka kdew ba lada don ki snem kiba kiwei kino kino ki jaidbynriew kim lah ban pyndap ïa ka kam bathylli yn thung pat ha jaka jong ki da kiwei pat kiba lah ban pyndap hynrei ïa ka bhah jong ki yn rah sha u snem uba bud ha kaba ha kata ka snem kaba bud ka jingpynrungkam kan long ruh nalor ka bhah ba la mang lupa (40%) ryngkat ba kato kaba la rah na u snem uba ladep,” u la bynrap.
Shuh shuh u la ong ba lada dei ba kita ki kynhun kim lah ban pyndap wat ha ka snem kaba bud ïa ka bhah jong ki na ka daw ba kim bng ki kyrdan ne na kiwei pat ki daw kane ka bhah kaba rah na u snem uba kham ha shuwa kan kut noh.
“Hynrei kumba long mynta ka jingthungkam ha ki tnat Sorkar ka long beit da kaba pynshong nongrim beit naduh u snem 1972 ha kaba ha ki jaka kiba ym lah ban pyndap da ki Garo ne Khasi yn thungkam na kane ka bhah da ka jingwan ka Roster System kaba long pyrshah ïa ka para 2 jong ka Resolution ba la mynjur ha u 1972,” u la bynrap.
U la ïathuh ba ka seng ka la aiti da ka dorkhas sha ka Myntri ka tnat Aiñ ka Sorkar Jylla ka Dr. M. Ampareen Lyngdoh ban bishar biang ïa kane ka Roster System namarba ka long be-aiñ. “Ka Sorkar kam ju lah ban pynmih kino kino ki hukum khlem da don ki aiñ kiba aibor ba kata ka hukum kan treikam namarba ka Roster kam don ki kyndon kiba kyrshan ha ka Reservation Policy ban pyntreikam ïa ka Roster System ka long kaba be-aiñ,” u la ong.
U la ong ba ka Ïingbishar ka la pyndam noh ïa kane ka mukotduma ba ka la shim Sou Muto kam shym pat la eksamin ba kine ki kyndon ha ka Roster ki long kiba biang bad ba shong aiñ namarkata ka jingpyntreikam ka long be-aiñ lada peit na ka Resolution jong u 1972.