Shillong, Lber 21 : U Myntri Rangbah u Conrad Sangma sa shisien pat ula iai ban ba ka shnong Mukroh ka dang hap hapoh u pud u sam ka Meghalaya da kaba kdew ïa u Census Code, ka jingdon ki jaka thep vote ha Meghalaya, ka jingdon ki VEC bad kiwei kiwei de ki sakhi.
Haba jubab ia ka jingkylli bynrap bala wanrah da u MLA ka VPP na North Shillong Bah Adelbert Nongrum mynta ka sngi ha ïingdorbar, u Conrad ula ong ba kat kum ka census code, ki jaka thep vote, ka jingdon ki VEC ka Mukroh ka dang hap hapoh u pud u sam jong ka West Jaintia Hills District.
Lah ban kdew hangne ba ha kine ki khyndiat sngi baladep, u Myntri Rangbah ka Assam, u Himanta Biswa Sarma ruh u la ïathuh hapoh ïingdorbar ka Assam ba ka Mukroh ka hap hapoh u pud u sam ka Assam namar ka don ha ka West Karbi Anglong District.
Nalor u Census Code, ki VEC, ki jaka thep vote, u Myntri Rangbah u la ïathuh ruh ba ha Mukroh don ka Lower Primary School, Health Sub Centre bad kiwei kiwei kiba la tei da ka sorkar Meghalaya.
Halor ka jingkylli shuh shuh da u Bah Adelbert Nongrum, u Myntri Rangbah u la ong ba um lah jubab than namar ba ka dang don ka jingtohkit ha kaba ïadei bad ka jingshah siat ïap ki 5 ngut ki briew ha Mukroh, hynrei u la ong ba ka sorkar kala ujor ejehar halor ka jingshah siat iap kine ki san ngut ha ka 22 tarik u Naiwieng ka snem baladep bad ula ong ba ïa kane ka case la register hapoh ka Nartiang Police Station.
Ha shuwa jong ka jingkylli u Bah Adelbert, u Nongialam ka VPP bad MLA ka Nongkrem Bah Ardent M Basaiawmoit ula pynpaw ka jingsngewkhia halor ka jingbymshngaiñ ka jingim jong ki paidbah kiba shong ba sah ha ki shnong khappud bad u la kyntu ïa ka sorkar ba wat hapdeng ka jingïapynbeit pud dei ban pyrkhat shuwa ïa ka jingshongshngaiñ jong ki paidbah. U Bah Ardent u la buh ruh ka jingkylli balei ba kiba kum kine ki jingpyntieng pynsmiej na ka liang ka Assam ki ïai jia ha ki thaiñ khappud. U Myntri Rangbah ula ong ba ha kine ki sanphew snem, la sakhi ba ki don ki jingjia kiba jia ha ki jaka khappud bad kane hi ka mih na ka jingïakajia pud kaba pur pat sha ka jingïakynad bad poi sha ka jingïaumsnam ruh.
Kat kum ka jingong jong u, dei namar kane, baroh arliang mamla kila kam trai ia ki jaka bad lam sha ki jingjia bapher bapher.
Dei halor kine ki nongrim ba ka sorkar MDA kaba nyngkong kala angnud ban pynbeit noh ïa ka jingïakajia pud, khnang ban lait na ki jingjia kiba poi sha ka jingïakynad bad sha ka jingïaumsnam.
Nalor kane, u Myntri Rangbah ula pntip ba ha ki jaka khappud jong ki Jylla, ka Sorkar kala pynkha haduh 7 tylli ki border outpost. Nalor ki Police Station bad Outpost bala don lypa, kila don ruh ki Police Station ba tymmai bad ki Police Outpost kiba la pynieng shajan jong ki jaka khappud bad ka Assam.
U Conrad u la ong ruh ba ka Sorkar kala dep thaw biang ïa ki Regional Committee bala khlieh da ki Myntri Sorkar ban ïapynbeit ïa ki hynriew tylli ki jaka bym pat dep ïapynbeit bad ka Assam.
