COURTYARD Marroitt ka dei ka hotel kaba heh tam ha kane ka thaiñ shatei lam mihngi

0

Shillong, Lber 21 : Ka COURTYARD by Marroitt kadei kawei na ki hotel kaba heh tam ha kane ka thaiñ shatei lam mihngi jong ka ri India bad la plie paidbah ïa kane ka 5 Star Hotel ha ka 13 tarik u Rymphang, 2023 ha Jail Road Police Bazar, Shillong. Ym lah ban len bad baroh ki tip ba ka jaka kaba kane ka Hotel ka don hapoh u pud u sam jong ka khyndailad ka dei ka dohnud jong ka Nongbah Shillong, bad na kane ka Hotel kaba kynjang haduh 10 mala lah ban ïohi ïa ki lum ba ithiang kiba ker tawiar ïa ka sor bad ka mariang ba itynnad jong ka sor Shillong.
Ha ba kren bad ki lad pathai khubor, u Tushar Nagar uba dei u General Manager jong kane ka Five Star Hotel, u la ïathuh ba kane ka Hotel ka don haduh 182 tylli ki kamra kynthup ïa ki 10 tylli ki kamra remdor kum ki delux bad ki luxury suits kiba kot haduh kumba 40 hajar shi miet ha ryngkat bad ka khajna ba hap ban siew.“
Kane ka 5 Star Hotel ka don ïa ki lai tylli ki bynta ba kongsan na ka bynta jaka bam bad kiwei pat ki jingdonkam. Kawei na kine ka dei ka Spectra ha kaba lah ban ïoh ïa baroh ki jait jingbam ha ki por baroh wat ki jingbam riewlum tynrai ruh.
Kaba ar ka dei ka Tavern Club, kaba dei ka bar ban ïashong dih sngewbha bad pynjahthait ha kajuh ka mala kaba ha jrong ha ryngkat bad ka jaka jngi-pynngad (swimming pool). Kane ka Swimming Pool ka dei kaba lah ban pynsyaid ïa ka um khnang ba ki nongwan sah ne wan bam sngewbha kin ym sngewthut ïa ka mariang jong ka aïom khriat.
Ha ryngkat bad kane ka Tavern Club ka don ruh ka jaka ba la buh kyrpang ban pynbyrngia bad ki jinglehkai ïa ki khynnah bad khyllung khang ba kan ym long ka jingkhanglad ïa ki kmie ki kpa kiba don ba em ban pynjahthait ïalade da kaba wan sha kane ka jaka pynbyrngia bad pynsngewbha ïalade. La buh kyrpang ruh ïa ki nongpeit khyllung khnang ban ïaid beit ka kam.
Kaba lai ka dei ka Shillong Baking Company, ha kaba ki nongwan kai sngewbha ki lah ban ïoh lut ïa ki jait jingdih pynngad kum ki coffee sma iewbih, ki sha aiu re, ki jingbam ba dang shu shet kumto kumto bad ki jingbam bang bam thiang ba har rukom.
Kumta ka long ka kabu ïa ki nongleit nongwan jong kane ka juk mynta ba kin lah ban pyndonkam ïa kane ka 5 Hotel kaba don ïa ki Hall bad jaka pynlong jingïalang ba ha ka jingheh haduh kumba 9130 sq.fts bad ki lai tylli ki multi-functional conference rooms ba la pyndait da ki tiar ki tar technology kane ka juk stad mynta. Kine ki Hall ki long kiba paka na ka bynta ki kam khawai dawai, ki jingïathoh khraw burom bad kiwei pat ki jingïalang.
Ki nongleit nongwan kiba sah ha kane ka COURTYARD Marroitt, kin ym sngewthuh ba ki don shabar na la ka jong ka ïing ka sem ne ka shnong jong ki, namar ba hangne ki lah ban ïoh lut ïa baroh ki jingdonkam jong ki naduh ka Fitness Gym, ka Spa, ka jaka jngi, ka ïabam iadih sngewbha ha ryngkat ki jingput jingtem bad ki nongrwai kiba wan ban pynbyrngia bad pynsngewtynnad ïa ki briew man la ka janmiet.
Ki briew kiba sah ha kane ka Hotel kin ïoh ban sakhi ïa kata ka Shillong kaba la tip kum ka Schotland of the East na ki kamra kiba ki sah halor katei ka ïing paki dulan ba 10 mala kaba dei ka ïing kaba jrong tam ha kane ka nongbah Shillong, ong u Mr. Tushar Nagar, General Manager ka COURTYARD Marroitt, Shillong.

Leave A Reply

Your email address will not be published.