Shillong, Lber 21: U Myntri rangbah jong ka jylla u Conrad K Sangma ha ka sngi Baar u la ong ba ka sorkar kam pat lah ban loit marmar ïa u sohkyrdot ha ka tnat Pule Puthi jong ka jylla.
U Conrad u la ong ba ka tnat Pule Puthi ka dei kaba jyrwit jyrwat namar ha ki snem kba la dep la pynkha ïa kiba bun ki kyrdan ban weng ïa ki jingeh khyndiat pa khyndiat kaba lam pynban sha ka jingpynmih ïa ki kyrdan bapher bapher jong ki skul bad ki kyrdan bapher bapher jong ki nonghikai.
“Ngin nym lah ban law ïa ki sohkyrdot tang ha ka shikhyllipmat hynrei ngin sdang da ka lynti kaba kham suk ha kaba ngin shimkhia shuwa nyngkong ïa ki nonghikai adhoc bad ki nonghikai SSA, hadien kata yn sa pynbeit ryntih ïa ki skul bad hadien kata ngin sa wanrah da ka policy (kaba donkam ban thung) da ka education commission ban pynbeit ïa ka jingeh ha ka rukom kaba dei. Ngi kwah ban pynrung ha kane ka commission ïa ki riewshemphang ha ka pule puthi khnang ban ngin dup lah ban pynbeit ïa ki jingeh khyndiat pa khyndiat (ïa ki jingeh ha ka pule puthi),” u la ong.
U Myntri Rangbah u la pyntip ruh ba ha ka jylla ki don haduh kumba 15,000 tylli ki skul bad ki kolej katba ka jylla Manipur ka don tang kumba 4,000 tylli, u la ong ruh ba ha ka jylla jong ngi ki don haduh 12,000 ngut ki nonghikai SSA katba ka jylla Manipur pat tang 3,000 ngut.
U la ong “Wat la katta ngin ym kiar ïa kane ka jingeh.”
Shuh shuh u la ong ba kiba bun napdeng ki 1,755 tylli ki skul lower primary ym pat ju maramot eiei ha kine ki 30-40 snem.
U la ïathuh ruh ba kumba long mynta ka sorkar ka la bhah pisa sha ki 400 tylli ki skul ba kin tei thymmai ïa ka ïingskul jong ki.
U la kam ruh ba ka cess ba ïohlum na ki marpoh khyndew ym pat ju pyndonkam wat shien ruh na bynta ka pule puthi,, ‘hynrei mynta ka sorkar MDA ka la leh ïa kaba bhatam na bynta ban pynbha ïa ki skul bad ki jaka pule bad mynta ngi la sdang ban ïohi ba kane ka kam jong ngi ka la sdang seisoh,’ la ong u Myntri Rangbah.
