Shillong, Lber 21: Ka Khun Hynñiewtrep National Aweakning Movement (KHNAM) ha ka sngi baar ka la dawa na ka sorkar jylla ba kan pynduh noh ïa ki Personal Interview ha ki tnat bapher bapher jong ka sorkar jylla haba ka khot interview ïa ki samla ban ïoh rung kam ha ki kam kiba hap ha ka group B, C bad D.
Ha ka jingïakren sha ki lad pathai khubor u Vice- President ka KHNAM u Bah Thomas Passah u la ong ba lada peit nuksa na ka sorkar pdeng ba na ka liang jong ka ka la pynduh noh ïa ka Personal Interview haba khot interview ha ki kam jong ka naduh ka 1 Kyllalyngkot 2016.
“Na ka liang jong ngi ruh ha ki snem kiba la dep ngi la leit ban aiti da ka dorkhas sha ka sorkar MDA 1 ban dawa ban pynduh ïa ka Personal Interview namar ka jingpynlong ïa ka Personal Interview ka wanrah ïa ka jingleh shiliang khmat ha ka jingthungkam ha ki tnat sorkar bad kumjuh ka shu pynsyrwa kai ïa ka por ki ophisar bad ka shu pynlut phut ïa ka pisa u paidbah na bynta ban pynlong ïa kane ka interview,” u la ong.
U la ong ba ki don ruh kumba 23 tylli ki sorkar jylla ki la pynduh ïa kane ka Personal Interview ban wanrah ïa ka thungkam kaba khlem don ka jingleh shiliang khmat bad ka jingpynlut ïa ka por bad ka pisa jong ki ophisar bad jong u paidbah.
Shuh shuh u la ong ba ka KHNAM ka dawa ba ka sorkar jylla kan wanrah noh ïa ka Recruitment Policy khnang ba ka jingthungkam kan long kaba ïaid beit ïaid ryntih bad kaba biang por.
“Kumba long mynta ki samla kiba aplai ïa kino kino ki kam da ki lai saw snem naduh ba ki aplai ka shu sah kut beit kumto haduh ba teng teng ynda la shah khot interview ruh kim kynmaw shuh ba ki aplai kam namar ka la slem palat bad ngi sngewdei ba dei ban wanrah noh da kane ka policy khnang ba hadien ka jingkhot interview ka jingthungkam ruh kan bud ym ban shuh sahkut da ki bun bun snem kaba pynsah umdum pat ïa ki samla wadkam,” u la ong.
Shuh shuh ka KHNAM ka dawa ba ka Reservation Policy kam dei ban treikam ha ka bhah pule namar kane ka policy ka sorkar kaba ka mynjur ha u 1972 kam kren eiei ruh shaphang ka bhah ïa ki Khasi ne Garo ha ka jingpule jong ki hynrei ka kdew beit thik tang ha ki kam sorkar.
“Kiba bun bah ki bhah leit pule jong ka sorkar jylla ki sepei lut na ka daw ka Reservation Policy namar ki samla kiba leit pule bunsien ki lah ba pyndep na ka daw lehse ka jingbym lah na ka jigbym kotbor ka jabieng katba kito kiba kot bor pat kim ïohlad namar la ai bhah beit wat ïa kiba duna bun shah lyngba ka Reservation Policy,” u la ong.
“Lada ngi kren shaphang ka State Reservation Policy ngin hap peit ruh ïa ka Riti Synshar ka ri ïa ka Article 16 kaba kdew shaphang ka bhah ha ki kam ki jam hynrei lada dei pat ïa ka bhah kyrpang ha ka kam pule puthi ka kynthup ha ka Article 46 kaba mut ba kawei na kawei ka don ka jingïapher namarkata ka dei ban pyndhuh beit noh ïa kane ka bhah kyrpang ha ka pule puthi,” u la bynrap.
U la ong ba ka jingdon kane ka bhah kyrpang ha ka kam pule puthi ka ka pynduh lad ïa kiba bun bah ki samla kiba pas bha ban leit pule katba kiba ïoh mark kham duna bun shah ki ïoh pule.
