Shillong, Risaw 02: Ka Mawlai ka la pynliem noh da 2-1 ïa ka Sawmer hynne ka sngi Thohdieng ha SSA Stadium ban jam kham shajan sha ka nam lahduh jong ka Shillong Premier League 2026.
U Damanbhalang Chyne (45’+1) bad u Jestibor Mawlong (76’) ki la pynkhihjar na ka bynta ka Mawlai katba u Orestar Sad (62’) u la pynïakhaid shipor ïa ka jingïalehkai na ka bynta ka Sawmer, kaba la pynsyier mynsiem ïa ka Mawlai.
Hadien 8 tylli ki jingïalehkai ka Mawlai ka la wanphai biang sha khlieh duh jong ka miej bad kan rah syndon ïa ka nam lahduh lada ka lah ban pynliem ïa ka Rangdajied United ha kane ka taïew ban wan. Da kane ka jingjop ka Mawlai mynta ka la kamai 18 point, bud sa ka Shillong Lajong ha ka kyrdan ba ar da 17 point, nangta ka Langsning (16 point) bad ka Nongkseh (13 point) ha ka kyrdan ba lai bad ba saw. Katba ka Sawmer, ka wan ha ka kyrdan ba hynñiew da 9 point.
Ka jingïakhun ka la khihwin naduh kaba sdang, ha kaba u Lovingstar Suting u la shah khanglad ha u rangap kol ka Sawmer u Urbanity Makhroh ha ka minit ba nyngkong jong ka jingïalehkai.
Tang hadien 10 minit ka la don ka jingpyrta kaba jam na ka Mawlai ha ka por ba u Damanbhalang u la shah pynur hapoh box da u Khrawkupar Tamu, hynrei u referee Hopewelson Hujon um shym ïohi kano kano ka jingbakla.
Ka Mawlai ka la ïai bteng ban tur shakhmat, bad u Wadshwa Latoo u la lah ban pynrung ïa ka bol shapoh kol hynrei la shah kyntait noh namar ka offside.
Hynrei tang mar ïa paw ba ka Sawmer kan jam sha ka por shongthait khlem da shah thep, u Damanbhalang u la pynkhihjar na ka bynta ka Mawlai. Ka jingbakla pashat bol jong ka Sawmer ka la plielad ïa u Ricky Chyne ban tehlakam ïa ka bol shuwa ba un pynbuh pat na ka bynta u Daman, uba la thep da ka kjat kadiang.
Haba jam sha ka kylla miet, ka Mawlai ka la jan shah thep hadien ba u Wadshwa u la kum aiti ïa ka bol sha ka liang pyrshah bad u Bickyson Kharkongor ka Sawmer u la pyrshang da kaba tyngeh, ha kaba u Lambhamiki Lamare rangap kol ka Mawlai, u la hap ban ryngkoh ban pynkiar ïa ka bol sha ka bynta ka korner.
Hadien ba kynjoh shi kynta, ka Sawmer ka la ïoh biang sa kawei ka kabu ksiar, hynrei u Banteilang Lyngdoh u la artatien ha jaka ban pyrshang beit sha kol u la pashat na ka bynta u Bickyson.
Hynrei tang hadien 2 minit ka Sawmer ka la pynïakhaid lyngba u Orestar, kaba dei ruh ka kol kaba nyngkong jong u mynta ka samoi. Kane kadei ruh tang ka sien kaba ar, ba ka Mawlai kan shah thep ha ka SPL 2026.
Kane ka la long shisha ka jingkyndit ïa ka Mawlai hynrei ka jingïaroh ka long sha ki rangïalehkai, ki bym shym la kynrandien bad ïakhun dohïap haduh kaba kut. Ka jingtrei shitom jong ki ka la seisoh ha ka minit kaba 76, ha kaba u Jestibor u la thep ïa ka namtam ban khur pura ïa ki 3 point.
Kane ka long ka jingjop kaba kongsam tam na ka bynta ka Mawlai hynrei kin dang hap ban jop ïa ka jingïalehkai ba khatduh ynda kin aireng pyrshah ïa ka Rangdajied ha ka sngi Balang.
Shuwa kata, mynta ka sngi yn sakhi ïa ka Nongkseh ka ban aireng pyrshah ïa ka Laitkor ha ka por 3 baje nohphai sngi. Ka Nongkseh ka dei ban jop khnang ban pynneh pynsah ïa ka jingkyrmen jong ki ban ïoh ïa ka nam lahduh, katba ka Laitkor kaba don ha ka kyrdan kaba khyndai kan ïakhun dohïap ban kyntiew ïalade sha ka kyrdan kaba hynñiew lada ki ïoh ïa ka jingjop.
