Ka jingsdang ka Dorbar Mang Tyngka ka jylla ha ka Lah Sngi U Blei ka la sakhi ba ka don ka jingïania kaba jur hapdeng ki MLA na ka Voice of the People Party khamtam na u President ka party uba dei ruh u MLA jong ka Nongkrem u Bah Ardent Basaïawmoit bad u Myntri Rangbah ka jylla u Conrad Kongkal Sangma halor ka jingpyndonkam jong u Lat ka jylla u Phagu Chauhan da ka ktien Hindi ban ai jingkren ha ka sngi sdang jong ka Dorbar Mang Tyngka hapoh ka Assembly kaba la poi shaduh u pud ba ki MLA ka VPP ki phet jyndat na Iingdorbar Thawaiñ katba u Lat u dang ai ka jingkren namarba u Lamphang ka Iingdorbar u Thomas A Sangma u la ai jingbit ba u Lat un pyndonkam da ka ktien Hindi watla ki MLA ka VPP ki pyrshah.
Ka jingkylli kaba mih mynta pat ka long ba hato kane ka jingleh ki MLA ka VPP ka long mo kaba shongnia ban shim kat ïa ka sienjam ban mih jyndat napoh ka Iingdorbar katba u Lat u dang ai jingkren?
ñiuma phi lah ban ong ba ka long kaba shongnia ne ka bym shongnia hynrei ngin ïapeit khyndiat ïa ka jingpyrshah ki katto katne ki jylla halor ka jingpyrshang da ka Sorkar Pdeng ban phah da ki briew jong ka ki bym nang kren Phareng hynrei kiba nang tang ban kren tang ka Hindi sha ki jylla bym kren Hindi.
Ngi lah ban ïohi ba ka jingpyrshah jong ki jaidbynriew Tamil ïa ka jingpyrshang ban thyngngiañ jubor da ka ktien Hindi da ka Sorkar Pdeng ka la poi haduh u pud ba ka Sorkar Jylla ka la wanrah syndon da ka Resolution ban pynpaw ïa kane ka jingpyrshang jong ka Sorkar Pdeng. Ngi ïohi kumno ba ka jingphah shithi da ka Sorkar Pdeng sha ki ophisar Sorkar bad ki MP ha ka ktien Hindi ka la wanrah ïa ka jingpyrshah kaba jur khamtam na ka seng DMK katba ka BJP pat barabor ka ju ai jingkyrshan beit ïa kane ka jingthmu jong ka Sorkar Pdeng.
Shuh shuh lada ngi phai sha ka Jylla kaba marjan ka Mizoram, ka don ka jingpyrshah da ka Sorkar Jylla hapoh ka jingïalam jong u Zoramthanga u la phah syndon da ka jingthoh sha u Myntri ka tnat Kam Pohing jong ka Sorkar Pdeng u Amit Shah halor ka jingthung Chief Secretary da ka ophisar IAS kaba nang ban kren tang da ka ktien Hindi. La ïohi ba u Myntri Rangbah jong ka Jylla Mizoram u la phah syndon da ka shithi sha u Amit Shah halor kane da kaba kdew ba ki Myntri jong u kim nang satia ban kren ïa ka ktien Hindi bad kim sngewthuh ruh lada kren ïa ka ktien Hindi bad na kata ka daw u la ai jingmut ban pynkynriah noh ïa kane ka Ophisar bad ai da kiba nang ban kren Mizo ne la kumno kumno kiba nang ban kren Phareng.
Lah ban ïohi ba ka jingburom ki jaidbynriew Tamil ïa la ka ktien bad kumjuh ki Mizo bad kiwei ki jylla kiba don ha South India ka long kaba palat liam ban pynbor ïa ki ban kren da ka ktien Hindi ka la dei ka kam kaba kim lah ban pdiang lano lano ruh namar ha ki ka ktien ka la dei ka snap kyrpang jong ka jinglong jaidbynriew jong ki.
Lada ngi phai sha ki nongthoh bakhraw jong ka jaidbynriew kum u Phadar H. Elias u la ong ba kano kano ka jaidbynriew kaba dang kren ïa ka ktien lajong ka dei ka jaidbynriew kaba dang im. Lada ngi phai sha u Myllung Kynpham Sing Nongkynrih ha kawei na ki jingrwai poitri jong u shaphang u ‘Ren’ u ong ba kumba u Ren u ong ha la ka kmie ba katba ka sur ha ka wah ka dang sawa ka pynpaw ba u dang im bad la ka mahadei puri jong u da kaba ong ruh katba ka sur kren da ka Ktien Khasi dang ïohsngew ha khyndailad bad Iewduh ne kino kino ki jaka ka pyni ba ka jaidbynriew ka dang im.
Kumba baroh baroh ki ong ba ka Sorkar BJP ka don ka thong ban pynlong ïa ka ri India ka ri tang kawei ka ktien, kawei ka kolshor, kawei ka niam bad kumta terter kane ka phalang da ka jingsdang ban mang tyngka ïa ki jaka ai jinghikai ha ka ktien Hindi nangta sa u Lat ba ka phah sha ka jylla uba kren da ka ktien Hindi, imat lah ban ong ba ka lam shisha shata kumba ju don ki jingkynnoh.
Mynta ka jingkylli kaba mih ka long ba hato kata ka jingpyrshang pynbor kren bad thoh Hindi ne Hindi Imposition ka long mo kaba shisha lada phai shuwa tang sha ka jylla jong ngi imat kan lam shisha shata kumba la kdew haneng?
Ngin poi mynta pat sha ka jingphet jyndat jong ki MLA ka VPP na Assambly katba u Lat u dang kren da ka ktien Hindi ngi lah ban buh jingkylli hato kane ka shong nia ne ka dei tang ka drama saiñ pyrthei jong ki? Ngi lah ban ong ba ka long kaba dei ban mih jyndat namarba u Lamphang u la ailad ïa u Lat ban kren da ka ktien Hindi kaba long pyrshah ïa ki kyndon pynïaid dorbar namarba la kdew shai ba lada ki dkhot kim nang kren Phareng ki lah ban kren Hindi tangba ki dei ban pynbiang ïa ka jingkren jong ki da ka jingthoh ha ka ktien Phareng hynrei ngi dei ban kynmaw ba u Lat um dei satia u dkhot hynrei tang uba shah khot sngewbha.
Namarkata, ngi hap ba ong ‘Shabas’ VPP phi la leh ïa kaba dei eh bad ka kam ka dawa ban ïoh jingïaroh na u briew bad u Blei ban pyrshah ïa ka jingkren u Lat ka Jylla da ka ktien Hindi hapoh ka Iingdorbar Thawaiñ.
Ka jingïohlad jong ka ktien Hindi ban rung hapoh Assembly ka ladei ka mat ba ngi dei ban sngewrem namarba ka dei kynroh ba khlaiñ tam bad kiba khatduh ka jylla na kata ka daw ngi lah ban ong ba ka jingphet jong ki MLA ka VPP ka long ka kam kaba shongnia shongkhia bad kaba kit jingmut.
