Kut ka noh ka tamasa Nurturing Young Minds ba 3 sngi ka NERIE ha Umïam

Nongpoh, Lber 07: Ka North Eastern Regional Institute of Education (NCERT), Umïam mynta ka sngi ka la pynkut noh ïa ka tamasa ki heprit ba 3 sngi lynter kaba la tip kum ka Nurturing Young Minds for the 21st Century Learning Skills kaba la sdang naduh ka 5 tarik haduh 7 tarik Lber 2025 bala wan ruh ban shim bynta shitrhem da kumba 300 ngut ki khynnah pule na kylleng ki jylla ka thaiñ Shatei Lam Mihngi ka ri India.
Ha ki lai sngi lynter la pynlong ruh ïa ki prokram bapher bapher khamtam ki jinghikai ban phrang jingstad ïa ki khynnah katkum ka juk stad kaba mynta ban ai rynsan ïa ki khynnah pule kumno ban pynkhlaiñ ïa ka bor pyrkhat pyrdaiñ, ka rukom kren ïa ki briew, ban pynjanai ïa ki sap kyrpang ba ki khynnah ki don naduh ka sap lehkai, sap shna, dro dur bad kiwei kiwei ban ïaid ryngkat ruh bad ka National Education Policy 2020.
Ka tamasa ka pynleit jingmut ruh kumno ban hikai ïa ki khynnah katkum ka juk ba mynta naduh ka rukom pyrkhat bad ban weng ïa ki jingeh bala tip haka ktien nongwei kum ka Critical Thinking & Problem-Solving, Scientific Inquiry & Mathematical Reasoning, Cognitive Learning & Adaptability, Innovation & Creativity, Communication & Public Speaking, Inclusion, Collaboration & Social Awareness, Cultural & Artistic Expression, Design Thinking & Product Innovation, Physical Well-being & Resilience, Time & Stress Management, Digital Literacy & Media Communication bad kiwei kiwei.
Haba kren ha kane ka sngi na ka liang ka Dr Flourette G Dkhar Principal ka NERIE ka la pynpaw ka jingsngewkmen ba katei ka tamasa ka la long kaba jop da ka jingshim bynta shitrhem jong ki 300 ngut ki khynnah skul ka thaiñ Shatei Lam mihngi, khamtam ban ailad ïa ki khynnah ba ïoh ïa ka jingstad lem bad ka jingshem haka rukom kaba kmen katkum ka juk stad kaba mynta ba ki khynnah kin sngewtynnad kumno ban pule bad ban khlaiñ ka pyrkhat pyrdaiñ.
Katto katne ki khynnah ki la pynpaw ruh ba kane ka dei ka sien ba nyngkong ba ki ïohlad ban sshim bynta kum ha katei ka tamasa ban ailad ïa ki ban pyni ïa ki sap ba ki don haki lain bapher bapher, khamtam ba ki ïohlad kumno ban dang pyniar bad pynheh ïa ka pyrkhat bad ka pule ka puthi namar ka jingpule kam dei tang ka kam pule kot hynrei ki bun ki bynta ban pynjanai ïa ka jingstad bad khamtam ban phrang naduh ka rta kaba dang rit.
Lyngba katei ka tamasa ki khynnah ki ïohlad ruh ban lehkai, ban shad ban rwai, bad mynta ka sngi pynkut la sam ruh ïa ki khusnam bad ki certificate sha ki khynnah kiba la wan ban shim bynta ha katei ka prokram.