Ïoh ka jylla palat T. 7 hajar klur ki projek ha kine ki 7 snem ba la leit, ïathuh u Conrad

Shillong, Lber 07: U Myntri Rangbah ka Jylla Conrad K Sangma ha ka sngi Thohdieng ula ïathuh ba ka Jylla ka la lah ban ïoh palat T. 7,427 klur ki project ha kine ki hynñiew snem ba la leit noh bad T. 2400 klur la bei ruh da ka Sorkar Pdeng na ka bynta ka Meghalaya Economic Growth Corridor namar ki kam ki stad ki jhad lyngba ka jingthung consultant.
Na ka liang u Myntri Rangbah u la pyntip ïa kane haba jubab ïa ka jingkylli ba la wanrah da ka Liang Pyrshah ha ïingdorbar Thaw Aiñ halor ka rai jong ka Sorkar ban thung ïa ki consultant bad ka jingdonkam ban hikai ïa ki samla ka jylla ba kin trei ïa ki kam consultant.
U la ong ba haduh 39 ngut ki consultant shimet bad 69 tylli ki kompeni consultant la ai kam hapoh ka Jylla mynta.
Haba pynksan ïa ka rai, u Conrad ula ïathuh ba ha kine ki hynñiew snem, ka Sorkar ka la lah ban wanrah haduh 13 tylli ki project ba bei tyngka na shabar (Externally Aided Project) hadien ka jingïathong bad ki Ri bapher bapher.
“Namar jong ka kam kine ki stad ki jhad, ngi la ïoh ïa ka song pisa ba palat T.7,427 klur,” ula pyntip.
Kumjuh ruh, u Myntri Rangbah ula pyntip, “Ngi la leit bad ïakynduh ïa ka Myntri pla tyngka bad ka la bthah ïa ngi ban aiti noh mar mar ïa ka Detailed Project Report (DPR) haba ïadei bad ka Meghalaya Economic Growth Corridor project hapoh ar kynta. Tang namar ka jingdon ki consultant ba ngi thung, ngi la lah ban pyndep hapoh ka 7 sngi bad ngi la ïoh ïa ka mang tyngka ba T.2400 klur na ka Ministry of Finance”.
U Myntri Rangbah ula pyntip ruh ba ka Meghalaya ka dei ka Jylla ba nyngkong ban buh ïa ka jingtyrwa ïa ka project Utility Mall ba T.132 klur bad pyntip ba ïa kane ka mall yn sa pynïaid da ki samla ka Jylla.
U pyntip ba ki kam ki la ïaid mynta ban pyntbit ïa ki sap treikam jong ki samla shynrang bad kynthei ka Jylla ba kin trei ïa ki kam consultant.
“Mynshuwa, kumba 2-3% eh ki samla trai Jylla kila trei ha ki kompeni consultant. Hynrei, mynta ngi la jan kot ïa ka 30% ha kine ki 5-6 snem ba la leit noh,” ula ong haba kular ba ka Sorkar kan pyrshang kat kaba lah ban pynthikna ba bun ki samla kin nang rung sha kane ka kam.
Nalor kane, u Myntri Rangbah ula ong ba kane kam don jingktah satia ïa ka pla tyngka jong ka Jylla naba tang 1% na ka dor jong ka projek la siew sha ki consultant.
U MLA ka VPP na Nongkrem Ardent M Basaiawmoit haba wanrah ïa ka jingkylli bynrap ula kynnoh ba ka Sorkar ka la siew da ki lak tyngka ïa ki consultant bad siew tang da ki hajar ïa ki samla trai Jylla watla ki la trei shitom, ïa kaba u Myntri Rangbah ula pynshai ba ka rukom siew jingsiew ka dei kaba shai bha.
“Ka jingkylli ba ngi siew bun ïa ki briew ba nabar bad siew duna ïa ki samla shynrang bad kynthei jong ngi kam mih satia namar kane kam dei ka rukom treikam jong ngi” ong u Conrad.
Haba u Nongïalam ka Liang Pyrshah Mukul Sangma ula kynnoh ba ki consultant ki la sei tulop kham bun ban ïa ki Ophisar ka Jylla, u Myntri Rangbah ula ong ba ïa kane ka kam la leh lyngba ka jingkhot tender bad dei ka kompeni kaba siew ïa ki consultant ym ka Sorkar.